Violenza sexualisada n'haja da far nagut cun sex. Mabain cun pussanza. Uschia cussegliera naziunala Tamara Funiciello tar la preschentaziun da la campagna «16 dis cunter violenza envers dunnas». Per pudair far ina fin a questa furma da violenza stoppia il dischequiliber da pussanza tranter las schlattainas vegnir cumbattì.
Almain mintga segunda dunna è tenor in studi pertutgada da violenza sexualisada. Tuttina vegnia violenza sexualisada tematisada memia pauc. Mulesta verbala ch'objectifitgeschia dunnas chaschunia violaziuns pli fermas. E tuttina vegnian mulestas verbalas toleradas sco «normalas». Quai saja in problem che pertutgia nus tuts, uschia Anna-Béatrice Schmaltz, la manadra da la campagna.
Dretg penal sexual duai vegnir refurmà
Perquai pretendan las organisaturas ch'il dretg penal sexual duai vegnir refurmà. Actualmain valia tar ina violaziun il principi da la violenza duvrada e con fitg che l'unfrenda e sa dustada. Uss saja nairas uras ch'i valia il principi da consens: «Mo GEA munta GEA». Quai duai vegnir fixà en la lescha ed er en la societad. La campagna vegn coordinada da la cfd, l'organisaziun feministica da pasch. Durant ils 16 dis d'acziun datti en l'entira Svizra dapli che 130 occurrenzas sco per exempel discussiuns al podi u er acziuns sin via.