Il Cussegl federal vul schlargiar il fatg giuridic da la violenza sexualisada en la lescha penala. Nov è era chastiabel tgi ch'agescha cunter la veglia da la victima u dal victim. Il princip «Na vul dir Na» duai valair. Violenza u smanatscha na sto betg pli esser dada.
Il fatg da violenza sexualisada cumpiglia tenor la revisiun tut ils cas, nua che la delinquenta u il delinquent agescha intenziunalmain cunter l'expressiun verbala da la victima u il victim.
Adattaziun ad il svilup social
Il princip «Sulet Gea vul dir Gea» è gia vegnì refusà da la cumissiun. Per il Cussegl federal è la revisiun dal dretg penal sexual ina adattaziun ad il svilup social. I na saja betg pli acceptà da la societad ch'i dovra necessariamain in act sexual sfurzà per ina condemnaziun.
Populaziun per «Sulet Gea vul dir Gea»
Il princip «Sulet Gea vul dir Gea» tar il sex sustegna bunamain la mesadad dals dumandads d'ina retschertga. Tge schliaziun che protegia il meglier persunas da violenza sexualisada, ha l'institut da retschertga gfs.berna intercurì sin incumbensa da Amnesty International Svizra.
Cun ils resultats dal studi vul Amnesty Svizra er appellar a la responsabladad dal parlament. Il Cussegl dals chantuns vegn a tractar la refurma en la sessiun da stad. Il dretg penal sexual duai vegnir adattà als basegns da las persunas ch'èn pertutgadas il pli fitg da violenza sexualisada.