Cun surpigliar la firma Vipco vul Stadler Rail rinforzar ses svilup da cumponentas da soft- e hardware per lur vehichels, ha communitgà la firma svizra.
Dapi passa 20 onns tutgia quest team da radund 50 inschigners ed inschigneras tar ils piuniers per applicaziuns e tecnologias che vegnan en acziun là nua ch'electronica vegnia strapatschada da cundiziuns d'ambient extremas.
Dasper il svilup da cumponentas da hard- e software per manar ed automatisar vehichels, vegnia la firma er a sviluppar vinavant ils sistems da communicaziun e diagnosa tar l'entira gruppa da Stadler, scriva l'interpresa. In ulteriur punct impurtant vegnia mess sin il retrofit da vehichels, per uschia pudair prolungar ils ciclus da vita ed il comfort dals trens. Detagls finanzials n'han las interpresas betg communitgà.