Il dumber da novas infecziuns ed ospitalisaziuns restia aut, ha ditg Virginie Masserey da l'Uffizi federal da sanadad il mardi avant las medias a Berna. Ins vesia dentant uss ina emprima stabilisaziun. La situaziun en ils ospitals restia dentant tuttina tendida. Anc adina saja numnadamain il dumber da pazients che drovan tgira intensiva creschent.
I saja perquai uss anc adina fitg impurtant da sa tegnair vi da las mesiras, ha accentuà Virginie Masserey. Quai saja l'unica pussaivladad da reducir il squitsch dal sectur da sanadad. Il medem mument restia il contact tracing en ils chantuns fitg impurtant.
Ils ospitals disponan be da pitschnas reservas
Tenor Andreas Stettbacher, delegà dal Cussegl federal per il servetsch sanitar coordinà, èn actualmain radund 16'900 dals letgs d'ospital acuts occupads. I dat pia anc ina reserva da 24%. Tar ils plazs d'ospital intensivs muntia la reserva anc a 21%.
Da tut ils letgs acuts sajan var 19% occupads cun pazients da Covid-19, pia bunamain mintg tschintgavel letg. Sin las staziuns intensivas èn 60% da tut ils pazients malsauns da Covid-19. En omadus secturs creschia il dumber da pazients dentant vinavant, ha ditg Stettbacher.
Letgs intensivs certifitgads èn quasi occupads
En l'entira Svizra dettia 876 letgs da tgira intensiva certifitgads e quels sajan quasi tuts occupads, ha ditg Stettbacher. I dettia dentant anc var 240 letgs intensivs betg certifitgads che sajan libers. Quels sajan vegnids stgaffids supplementarmain.
Da tschertas regiuns stoppian pazients che drovan tgira intensiva gia vegnir transferids en autras regiuns. Uschia vegnia garantì ch'ils ospitals possian mantegnair lur capacitad da prender si pazients novs. A partir dad ina occupaziun dad 80% cusseglian els perquai als ospitals da transferir pazients, ha ditg Stettbacher.
Infurmà il mardi a Berna han:
- Virginie Masserey, manadra da la secziun Controlla d'infecziun da l'Uffizi federal da sanadad BAG
- Andreas Stettbacher, delegà dal Cussegl federal per il servetsch sanitar coordinà