En connex cun la virola da schimgias ha l'Uffizi federal da sanadad BAG prendì emprimas mesiras. Quai ha ditg la vice-directura dal BAG envers SRF. Ins infurmeschia las autoritads ed il persunal da sanadad, sin tge guardar e co tractar ils cas.
Nagin medicament u vaccin
Tant in medicament antiviral sco er in vaccin da la pli nova generaziun cunter la virola na sajan betg accessibels en Svizra. L’Institut svizzer per products terapeutics Swissmedic n’haja survegnì naginas dumonda per ina lubientscha.
Emprim cas en Svizra
En Svizra è vegnì confermà l'emprim cas da la virola da schimgias. I sa tracta d'in cas en il chantun Berna, sco la direcziun da sanadad chantunala ha communitgà. Il cas è vegnì annunzià venderdi e confermà sonda, suenter intgins tests da labor. Il servetsch chantunal da medis ha instradà il contact tracing per pudair suandar eventualas vias d'infecziun. La persuna pertutgada saja probablamain s'infectada en l'Europa cun la malsogna. Ella è a chasa en isolaziun e sias persunas da contact sajan vegnidas infurmadas. Virologs na quintan dentant betg che la malsogna vegnia a sa derasar sco ina epidemia. La transmissiun dal virus saja numnadamain pli difficila.
Adina dapli pajais europeics annunzian cas da la virola da schimgias. Sulettamain mesemna han las autoritads da la Spagna e dal Portugal annunzià radund 40 cas da suspect. Ed er en Germania datti emprims cas.
La virola da schimgias
Umans infectads han sintoms sco in eczem che cumenza savens en fatscha e che sa derasa silsuenter sin autras parts dal corp, fevra, dolurs muscularas e snavurs. Ils blers sa revegnan entaifer da pliras emnas da la malsogna. L’Organisaziun mundiala da la sanadad WHO appellescha als stadis dad introducir in contact tracing per pudair interrumper las chadainas d’infecziun.