Pertutgadas èn tut las occurrenzas planisadas da tschaiver. Il virus da Corona ha cuntanschì er il sport svizzer. Dus gieus da hockey ch'èn previs per la fin d’emna duain avair lieu senza aspectaturs. Quai ha communitgà il cussegl guvernativ.
Il club da hockey dad Ambri è pertutgà gist duas giadas: en la partida a chasa da venderdi cunter Tavau ed en il derbi cunter Lugano. Quai èn ils ultims dus gieus da qualificaziun.
Finì cun ir en sortida
Dapi ier na dastgan ils recruts en il Tessin betg pli ir en sortida. Il scumond da sortir pertutgia tut ils trais lieus cun scolas da recruts, ad Airolo, Monteceneri ed Isone, ha declerà il pledader da l'armada Daniel Reist sin dumonda da l'agentura da novitads Keystone-SDA.
Puspè cumenzà tut normal ha dentant l'universitad privata Franklin University Switzerland a Sorengo. Suenter che la scola è stada serrada glindesdi, èn las prelecziuns idas enavant tut normal il mardi.
Tut sco fin qua per las scolas
La scola populara percunter duai cumenzar tut normal glindesdi suenter las vacanzas da tschaiver. Viadis da scola a l’ester n’èn però betg lubids fin la fin da mars.
Tut normal cuntinuescha l'instrucziun a l'Università della Svizzera Italiana. Ins saja en contact cun l'Uffizi federal da sanadad (BAG) e veglia ch'ils students sa cuntegnian a moda responsabla, sch'els turnian d'in pajais ch'è pertutgà dal virus da Corona.
RTR novitads 12:00+