Siglir tar il cuntegn

Header

cuntegn

Svizra Virus da Zika – mesira da segirezza tar il dar sang

En Svizra na dastgan persunas che returnan or da regiuns pertutgadas dal virus da Zika, betg dar sang durant 4 emnas.

La durada da questa quarantina da 28 dis saja la medema sco tar ulteriuras malsognas tropicas, ha il schef dal dar sang tar la Crusch Cotschna Svizra ditg a l'agentura da novitads sda. Quai saja la metoda la pli simpla, e pli bunmartgà che da testar donaziuns da sang gia prendidas.

La Svizra betg suletta

Mesiras sumegliantas han gia auters pajais decidì. En il Canada ston persunas che returnan da regiuns pertutgadas dal virus Zika, spetgar 21 dis fin ch’ellas pon dar sang. En la Gronda Britannia ed en la Frantscha èn quai 28 dis.

La gievgia passada aveva l’Organisaziun mundiala da la sanadad WHO confermà, che la quarantina da 28 dis per dar sang saja ina mesira da precauziun adattada.

In nov cas

Fin oz a l'Uffizi federal da sanadad dumbrà 3 viagiaturs cun in infecziun da Zika. Il davos cas ha l’uffizi confermà il glindesdi a l’agentura da novitads sda.

RR Novitads 21:00

Artitgels legids il pli savens