Siglir tar il cuntegn
cuntegn

Svizra Virustgel sa derasa – dentant betg en Svizra

Cun il virustgel èn s'infectadas l'onn passà en regiuns da l'Europa tantas persunas sco dapi 10 onns betg pli. Quai rapporta l'Organisaziun mundiala da la sanadad WHO. Il dumber dals cas saja creschì entaifer in onn per il traidubel. Excepziun è la Svizra. Là è il dumber sa reducì per la mesadad.

Purtret d'in medi che fa pront ina squitta per dar ina virola cunter il virustgel.
Legenda: Tantas infecziuns sco dapi 10 onns betg pli, dentant er tantas vaccinaziuns sco anc mai hai dà il 2018. Keystone

Cumpareglià cun l'onn 2016 èn perfin 15 giadas uschè bleras persunas s'infectadas, rapporta la WHO. Il 2016 avevan ins nudà in record da las pli paucas infecziuns.

En Svizra è il trend stà il cuntrari. Suenter 105 infecziuns il 2017, hai dà il 2018 be anc 51 cas. En ils 53 pajais da la regiun Europa da la WHO eran prest 82'600 persunas s'infectadas il 2018. 72 uffants e creschids èn morts vid las consequenzas, scriva la WHO. Ella quinta dasper las regiuns da l'Europa dal vest er la Russia, la Tirchia, l'Israel e l'Usbekistan ed Aserbaidschan ch'èn en l'Asia, tar ses territori.

Dapli infecziuns dentant er dapli virolaziuns

Tutgà il mender da tuts hai l'Ucraina cun passa 53'000 cas. Passa 2'000 cas han er annunzià la Serbia (5'076), l'Israel (2'919), la Frantscha (2'913), la Russia (2'256), l'Italia (2'517), la Georgia (2'203) e la Grezia (2'193).

I sajan er vegnids viroladas tantas persunas sco anc mai en las regiuns pertutgadas. Quai na tanschia dentant anc betg, vegn la directura dal biro regiunal da la WHO citada.

Nus stuain far dapli e far meglier nossa chaussa per proteger mintga suletta persuna da malsognas che pon vegnir evitadas a moda fitg simpla.
Autur: Zsuzsanna JakabDirectura dal biro regiunal da l'Europa da la WHO

Il virus po attatgar il tscharvè ed è perquai privlus per la vita. La WHO vul eliminar il virus dal virustgel.

RR novitads 11:00