Il minister da l’exteriur american Mike Pompeo è s’inscuntrà dumengia cun il cusseglier federal Ignazio Cassis. Tar l’inscunter èsi tranter auter ì per la cunvegna bilaterala da commerzi. Pompeo ha ludà las cundiziuns generalas en Svizra: Uschia saja la Svizra situada central, la situaziun politica saja stabila ed i dettia persunal qualifitgà. El saja optimistic ch'ils dus pajais vegnian da sa cunvegnir ad in cunvegna da commerzi.
Svizra represchentia bain interess americans en l'Iran
Pompeo ha era engrazià per l’engaschi diplomatic da la Svizra en l’Iran.
La Svizra fetschia servetschs impurtants per ils burgais americans, ha Pompeo ditg ad ina conferenza da medias. Gia dapi 40 onns represchentan diplomats svizzers ils Stadis Unids a Teheran. Envers l’Iran ha Pompeo annunzià ch’ils Stadis Unids sajan uss pronts per discurrer – e quai senza cundiziuns.
La relaziun tranter ils Stadis Unids e l’Iran è dapi l’entschatta matg pli tendida. Lura han ils Stadis Unids rinforzà lur preschientscha militara en la regiun.
RR novitads, 15:00