Siglir tar il cuntegn

Header

video
Irène Kälin: «Jau na chapesch quella critica betg.»
Or da News-Clip dals 28.04.2022.
abspielen. Laufzeit 34 Sekunden.
cuntegn

Visita en l'Ucraina Delegaziun svizra è puspè returnada

La delegaziun svizra è puspè returnada ord l'Ucraina. La gievgia ha Irène Kälin, la presidenta dal Cussegl naziunal, fatg ina conferenza da medias. Ella ha defendì la visita en l'Ucraina che n'era betg tuttina acceptada tar tuts. La Svizra na saja betg vegnida instrumentalisada. L'Ucraina haja chapì che la Svizra saja neutrala.

Jau giess adina puspè.
Autur: Irene Kälin presidenta dal Cussegl naziunal

Quai ha ella ditg la gievgia avant las medias a Berna. I saja stà impurtant dad esser preschent, era per planisar ils proxims pass. Ella haja tar mintga statement en l'Ucraina accentuà, che la Svizra na furneschia naginas armas. Las enconuschientschas gidian er da preparar la conferenza da l'Ucraina, ch'é il fandur a Lugano, di Kälin vinavant.

Era Yves Nidegger, il cusseglier naziunal da la PPS a Genevra, ha defendì sia participaziun a questa visita. Sia partida aveva crititgà la visita da la delegaziun en l'Ucraina.

Il viadi en l'Ucraina

La presidenta dal Cussegl naziunal, Irène Kälin, ed ulteriurs parlamentaris, eran arrivads la mesemna la damaun en l'Ucraina, sin in invit uffizial dal president dal parlament. Part da la delegaziun han fatg dasper la presidenta Irène Kälin (Verds/Argovia) er ils parlamentaris Roger Nordmann (PS/Vad), Nik Gugger (PEV/Turitg) ed Yves Nidegger (PPS/Genevra). Vitiers era da la partida l'ambassadur svizzer en l'Ucraina. Quai tenor l'infurmaziun dals servetschs parlamentaris sin Twitter.

Cun sia visita ha la delegaziun vulì exprimer la solidaritad da la Svizra cun la populaziun ucranaisa, e sustegnair las collegas d'uffizi da l'Ucraina. Tar sia visita a Kiew ha la delegaziun tranter auter gì in inscunter cun il president Wolodimir Selenski. Era ha la delegaziun visità las citads Homostel ed Irpin.

RTR novitads 15:00

Artitgels legids il pli savens

Scrollar a sanestra Scrollar a dretga