Il president franzos Emmanuel Macron e sia dunna Brigitte arrivan mesemna ad ina visita uffiziala da dus dis en Svizra.
Temas da discussiun cun il Cussegl federal vegnan ad esser las relaziuns diplomaticas ed ils dossiers bilaterals. Correspundentamain retschaiva l'entir Cussegl federal il pèr presidial sin la Plazza federala a Berna cun onurs militaras. En la sala dals pass pers da la Chasa federala suondan lura ils pleds da bainvegni uffizials, avant che las discussiuns politicas cumenzan en il Bernerhof.
Las relaziuns tranter la Frantscha e la Svizra èn da gronda impurtanza per economia, perscrutaziun, energia, ambient, sanadad e mobilitad, scriva il Departament federal da l'intern. Sin la glista da tractandas stattan er finamiras da la Svizra per sviluppar vinavant la via bilaterala cun l'Uniun europeica. Ultra da quai è planisà in barat davart actualitads politicas, la collavuraziun en il cussegl da segirezza da l'ONU, la Genevra internaziunala ed en la diplomazia scientifica.
Il segund di visitan il president da la Confederaziun Alain Berset e ses collega d'uffizi franzos la fundaziun Jean-Monnet a Losanna. Là èn conservads ils archivs dal pionier da la collavuraziun europeica suenter la segunda guerra mundiala.
Normalisaziun da las relaziuns bilateralas
A l'universitad da Losanna vegn Macron a tegnair in referat avant studentas e students davart las sfidas dal continent. Sin il program stat era ina visita tar l'Organisaziun europeica per la perscrutaziun nucleara (CERN) a Genevra.
Las relaziuns tranter la Svizra e la Frantscha èn stadas tendidas ils ultims onns, cunzunt suenter che la Svizra ha decidì da cumprar ses novs aviuns da cumbat dals Stadis Unids, empè da sa decider per ils Rafale franzos.
Il retschaviment dad Emmanuel Macron tras il Cussegl federal sco er la recenta decisiun d’elavurar in nov mandat da negoziaziun cun l’UE vegnan numnads sco segn ch'i dettia ina nova avischinaziun en las relaziuns Frantscha – Svizra.