Siglir tar il cuntegn

Header

cuntegn

Svizra Vitg da Heidi Flumserberg vegn pli concret

En il «Tannenboden» duai quai dar in nov vitg da Heidi cun dus novs hotels, ina nova telecabina sin il Maschgenkamm ed in percurs tras l'istogia da Heidi sin l'alp da Mols. La concurrenza d'investurs e gestiunaris è tant sco concludida, communitgeschan ils responsabels.

En collavuraziun cun il chantun Son Gagl vulan ils responsabels da turissem, economia d'alp e pendicularas schlargiar massiv la purschida turistica. Il vitg da Heidi duai procurar per giasts sin il «Tannenboden» sur onn. Quai vegn cumpletà cun purschidas ch'ins po cuntanscher cun la pendicularas nova.

L’istorgia daventa viva

Heidi, duas chauras e visitaders
Legenda: La Heidi dal nov vitg dal Flumserberg RTR/ Angela Hendry

Rodund 20 bajetgs èn planisads sin il “Tannenboden”, acturs ed acturas laschan reviver l’istorgia da Heidi. Uschia pon ins per exempel visitar igl Alpöhi en sia tegia e bajegiar ina stgabella, viagiar cun in tren da miniatura en la citad da Francfurt u visitar la tatta tschorva e preleger ad ella ina istorgia. L’istorgia da Heidi fascineschia, perquai ch’ella represchenti patria, sinceradad, onestadad, dentant era tema, l’istorgia saja ina che blers possian s’identifitgar, di Heinrich Michel, schef da las pendicularas Flumserberg.

Sin via al vitg da Heidi songagliais

La concurrenza d'investurs e gestiunaris ha gudagnà la Implenia Svizra, Coop e Steiner Sarn. En il rom dal concept per sviluppar il turissem al Flumserberg han las pendicularas Flumserberg SA, la corporaziun alp Mols e l'Uffizi per economia e lavur dal chantun Son Gagl fatg questa concurrenza. Uschia procura la Implenia per il svilup dal project, il Coop è partenari da distribuziun e la Steiner Sarnen fa il concept da niz e purschida.

Projects da Heidi grischuns sut squitsch

L'entir project avevan pendicularas, corporaziun d'alp ed uffizi chantunal preschentà il mars passà. Quai aveva mess sut squitsch ils da Grüsch-Danusa che avevan in project sumegliant sin rucca. Grüsch-Danusa aveva lura communitgà da vulair reponderar il project.

RR actualitad 07:00

Artitgels legids il pli savens