Cura ch'igl è chaud passentan bleras persunas lur temp liber sin la terrassa u en il curtin. Cunzunt sch'ils uffants han vacanzas vegni bleras giadas pli dad aut. En quel cas stoppian ins dentant tegnair ora in zichel dapli, di l'experta da dretg da SRF, Gabriela Baumgartner.
Sch'uffants giogan, curran enturn u sbragian èn quai ramurs che tutgan tar il mintgadi.
Ins possia dentant pretender dals geniturs ch'els prendian resguard, cunzunt sur mezdi e davent da las 22:00 uras.
Festa tar ils vischins
Il medem vala era sch'ils vischins fan ina festa ed èn dad aut. L'experta da dretg recumonda da tschertgar il discurs cun ils vischins e far attent els sin la canera. Sin il pli tard las 22:00 uras, en singuls lieus las 23:00, stoppia dentant esser ruaus.
Grillar na po betg vegnir scumandà
Per part stat en il reglament da chasa che grillar saja scumandà. Tenor l’Uniun da locataris giaja quel scumond memia lunsch.
Qua e là grillar na po l’administraziun betg scumandar, ma fimentar mintga bella saira ils vischins, na va dentant era betg.
I saja ina dumonda da la mesira. Ed en il mender cas possian ins ir endadens e serrar las fanestras per quella saira sch’il fim disturba. E sco tip numna l'Uniun da locataris da decorar il balcun cun plantas e fluras. Quellas gidan encuter il tuffien dal fim ed isoleschan in zichel la canera.
Betg far pass giuridics
Far pass giuridics pervia da disturbis da canera e fim, na cusseglia l'Uniun da locataris dentant betg. Pertge ins perdia il bler, perquai ch'ins haja memia paucs mussaments u ch'i vegn dubità ch'ins saja memia sensibels.