Siglir tar il cuntegn

Header

Navigaziun

cuntegn

Votar a moda electronica E-voting na vegn anc betg introducì sco terz chanal

En sia sesida ha il Cussegl federal decis da desister per il mument da la revisiun parziala da la lescha davart ils dretgs politics. Durant la fasa da consultaziun sajan bain blers s'exprimids per il votar electronic, las partidas sajan però da l'avis ch'i saja anc memia baud per l'introducziun.

Il Cussegl federal scriva en sia communicaziun ch'ina gronda part dals chantuns e da las partidas èn da principi per introducir il e-voting. La conferenza da las regenzas chantunalas sco era 19 chantuns beneventan da far or dal votar electronic la terza varianta fixa, dasper l'urna e la pussaivladad da votar per brev. Els èn dentant da l'avis ch'il pass da gia reveder e pigliar en questa pussaivladad en la lescha vegn memia baud. Perquai ha il Cussegl federal decis da desister il mument da la revisiun.

Mancanzas gravantas tar sistem da Posta

Cun quai suonda il Cussegl federal al svilup dals ultims mais. La Posta ha publitgà il favrer da quest onn il code per ses sistem verifitgà ed ha laschà far in test d'intrusiun. Suenter che perscrutaders avevan chattà mancanzas gravantas en quel, ha la chanzlia federala annunzià d'evaluar la situaziun.

Rapport fin il 2020

A la sesida da mesemna ha il Cussegl federal surdà a la chanzlia federala l'incumbensa da concepir da nov il manaschi per ina fasa da test, quai ensemen cun ils chantuns. Fin la fin dal 2020 duai lura dar in rapport. Finamira è d'elavurar in nov sistem d'emprova ch'è stabil e che funcziuna cun in sistem da la pli nova generaziun. Tar quai tutgia er da rinforzar las controllas independentas, da rinforzar la transparenza e la fidanza sco era da cumpigliar la scienza. Plinavant sajan las pretensiuns e process che valan ozendi d'examinar.

RR novitads 09:00