Proteger il clima va unicamain da maniera sociala – quai saja la persvasiun da la partida Verda svizra, scriva l'agentura da novitads svizra SDA en ses rapport da la radunanza da las delegadas ed ils delegads verds svizzers.
La partida verda ha deliberà la sonda ina resoluziun, che mussia co che mesiras consequentas per proteger il clima possian vegnir realisadas da maniera sociala.
Tuts pon profitar da mesiras da protecziun dal clima
Fundamental saja ina politica d'abitar e da traffic sociala ed ina plazza da finanzas persistenta, communitgescha la partida. La partida saja persvadida che la populaziun, l'economia e futuras generaziuns possian profitar – cun las dretgas circumstanzas – da mesiras da protecziun dal clima.
Er il sectur da finanzas duaja vegnir pli persistent. Uschia pretendan ils Verds da la Banca naziunal svizra da resguardar tar lur investiziuns er criteris da persistenza. L'ura ticchia:
Nus avain da chattar exactamain en quest decenni ina via ord la crisa da clima.
Vitiers ha la radunanza da delegads a Frauenfeld decidì unanimamain la parola NA a l'iniziativa da limitaziun da la PPS che vegn votada ils 17 da matg.
RTR novitads 17:00+
