Da tge sa tracti?
Questa iniziativa dal pievel pretenda che betg pli ils chantuns, mabain da nov la Confederaziun saja cumpetenta per stipendis en il sectur da la furmaziun superiura. Tgi che studegia en ina scola auta u fa ina furmaziun professiunala superiura, duai survegnir stipendis tenor criteris unitars che valan en tut la Svizra, e quests stipendis duain garantir in standard da viver minimal.
La dumonda da votaziun
Vulais Vus acceptar l’iniziativa dal pievel «Iniziativa davart ils stipendis»?
Dapli
Ils arguments dal comité d’iniziativa
- Il sistem actual n’è betg gist: I dependa dal chantun da domicil dals geniturs, sch’insatgi survegn sustegn avunda.
- Cun in sistem da stipendis gist po vegnir cumbattida la mancanza da spezialists, e quai va er a favur da l’economia svizra.
- La cuntraproposta n’è betg suffizienta: Ils chantuns cuntinuassan cun il tractament inegual ed er en l’avegnir na pudessan bleras persunas betg absolver ina scolaziun.
- Cun dir gea a l’Iniziativa davart ils stipendis vegn prestada ina investiziun impurtanta en l’avegnir da l’economia e da la societad svizra.
Ils arguments dal Cussegl federal
- Centralisaziun nunnecessaria. Ils chantuns enconuschan il meglier la situaziun da lur studentas e students.
- Divergenza è giustifitgada pertge igl è ina differenza, sche persunas pon frequentar in studi en il chantun, nua che lur famiglia viva, u sch’ellas ston ir a studegiar en in auter chantun.
- Cun in gea a l’iniziativa sa fermass il process d’armonisaziun dal sistem da stipendis ch’è gia vegnì instradà cun il Concordat da stipendis l’onn 2013.
- La nova Lescha federala davart las contribuziuns da scolaziun – la cuntraproposta indirecta a l’Iniziativa davart ils stipendis – promova questas stentas.
- Cun acceptar l’iniziativa stuessan vegnir augmentadas las prestaziuns totalas per studentas e students. Quests daners n’èn però betg simplamain avant maun.
Recumandaziun a votantas e votants
Il Cussegl federal ed il parlament recumondan da refusar l’iniziativa. Il Cussegl naziunal ha refusà l’iniziativa cun 135 cunter 58 vuschs e 2 abstenziuns, il Cussegl dals chantuns cun 32 cunter 12 vuschs ed 1 abstenziun.
