Las trais leschas avess il suveran approvà, pia la lescha da Covid-19, la lescha da CO2 sco er la lescha per cumbatter il terrorissem. Cunquai avessan ils resultats correspundì a las posiziuns da las autoritads. Ils 13 da zercladur decidan votantas e votants svizzers definitivamain a l'urna.
Iniziativa per aua da baiver netta
Ina maioritad da 53% da las persunas dumandadas refusa l'iniziativa che vul proteger l'aua, il funs e la biodiversitad. La furmaziun da l'opiniun è cunquai sa sviluppada a moda tipica tar iniziativas vers in Na. Tenor la retschertga da gfs.berna saja gia 70% da la populaziun segira, tge scriver sin il cedel da votar, tge che correspundia ad in stan avanzà. Cunquai che l'opiniun sa basia relativamain bain sin arguments, possia er la fin da la campagna strusch pli midar l'opiniun.
Cunzunt la populaziun che viva en la champagna saja cunter l'iniziativa. Simpatia giauda quella anc en il spazi da lingua taliana sco er en circuls academics. En pli sustegnan persunas svizras a l'exteriur e persunas che vivan en ina chasada cun in'auta entrada anc ferm l'iniziativa. Ma er en quels circuls creschia la sceptica. Cunquai resta il cler foss politic: L'aderenza da las partidas sanestras e la Partida verd-liberala vulan, malgrà il trend tar in Na, per gronda part votar per l'iniziativa, fertant che las aderenzas da las autras partidas veglian votar cunter.
Cler trend ad in Na
Cumpareglià cun l'emprima retschertga da votaziun è cunzunt la cumpart che metta segir in Na en l'urna creschida, quai per 12 puncts procentuals. Il cler trend ad in Na saja fundà da la tematica. Entant sajan puncts debels da l'iniziativa enconuschents e quels predomineschian pli e pli. Sulet l'idea per ina agricultura ch'è datiers a la natira na bastia betg pli per in Gea. Per regla na sa mida in tal trend strusch pli tar iniziativas.
Iniziativa per ina Svizra senza pesticids sintetics
Er l'iniziativa che vul scumandar pesticids sintetics ha pers sustegn. Radund trais emnas avant la dumengia da votaziun avessan 51% votà cunter u plitost cunter l'iniziativa. En quel cas sa mussa la situaziun pli stretga che tar l'iniziativa per aua da baiver netta, cunquai che il trend ad in Na saja damain cler.
Er tar quell'iniziativa saja la furmaziun da l'opiniun avanzada. Tenor la retschertga han 71% da las votantas e dals votants gia decis co votar. Il muster da conflict sa lascha cumparegliar fitg cun quel tar l'iniziativa per aua da baiver netta. Interessant è la differenziaziun tar votantas e votants da la Partida verd-liberala. Lezza ha decis la parola Gea tar l'aua da baiver netta e dà liber la vusch tar il scumond da pesticids sintetics. Cuntrari al trend general, sustegnan votantas e votants da la PVL trais emnas avant la votaziun pli fitg l'iniziativa ch'anc set emnas avant la votaziun.
Trend vers Na
Da principi na dettia strusch indizis che mussian en direcziun dad in Gea. Cura ch'i dettia in trend vers in Na tar iniziativas, lura vegnia quel strusch pli vulvì. Cunquai che las differenzas tranter Gea e Na sajan anc pitschnas, pudess quai tuttina anc dar surpraisas – quellas na correspundessan lura dentant betg a la norma.
Lescha CO2 sut squitsch
Anc adina sustegna ina maioritad da 54% la lescha da CO2. La maioritad è però sa reducida cumpareglià cun il resultat da l'emprima unda da retschertga, la fin d'avrigl. Lura aveva la vart Gea anc in avantatg da 14 puncts procentuals, trais emnas avant la votaziun munta quel anc ad 11 puncts procentuals.
Sustegn giauda la lescha da CO2 cunzunt da la sanestra. La dretga refusa quella. Votantas e votants ch'èn datiers a la Partida populara svizra sa mussan entant pli fitg cunter la lescha. Ils arguments n'èn betg sa midads: L'argument principal per votar Gea è d'agir cunter la midada dal clima – per in Na pleda surtut che stgaudar ed ir cun auto vegn pli char.
Il resultat da votaziun saja anc avert. I saja pussaivel ch'il trend vers in Na cuntinueschia e che la vart Na pudess surpigliar la maioritad.
Lescha da Covid-19
Ina clera maioritad da 64 pertschient avess miss ils 22 da matg in Gea en l'urna. La lescha da Covid-19 regla tranter auter las cumpetenzas dal Cussegl federal durant ina pandemia, dentant er il sustegn finanzial sco per exempel per cas da direzza. Cumpareglià cun il resultat da l'emprima unda da retschertga è il sustegn però sa sminuì per 3 puncts procentuals. Observà dinamicamain polarisescha l'opiniun vers Na. La vart Gea tegna però anc adina cleramain la maioritad. Uschia saja il scenari il pli probabel quel, che la Svizra acceptia la lescha da CO2.
Lescha per cumbatter il terrorissem
62% da las persunas dumandadas acceptan la lescha per cumbatter il terrorissem. La vart Na ha dentant pudì augmentar sia cumpart. Fertant che 24% han inditgà en l'emprima unda da votar segir u plitost cunter, èn quai en la segunda unda 32%. Er sch'i na saja betg tipic, che proposiziuns da las autoritads perdan sustegn curt avant la votaziun, saja il scenari il pli probabel, che la Svizra acceptia la lescha per cumbatter il terrorissem malgrà il trend vers Na, concluda la retschertga.
Interess surproporziunal
Actualmain èsi da quintar che 52% da las persunas cun dretg da vuschar en Svizra voteschan er ils 13 da zercladur. Quai è sur la media dals ultims 10 onns (46%). Ina raschun saja che las tschintg votaziuns sajan tematicamain fitg differentas e sveglian perquai l'interess tar differentas gruppas, scriva gfs.berna.
