Iniziativa per aua da baiver netta
54% da las persunas dumandadas beneventan l’iniziativa che vul proteger l’aua, il funs e la biodiversitad. Sustegn survegn l’idea surtut da la politica sanestra – entant che la politica dal center e da la dretga èn cunter. Plinavant datti in foss tranter citad (65% pro) e champagna (41%). Atipic èn las differenzas tranter las gruppas da vegliadetgna: Il pli grond sustegn datti da persunas pensiunadas (65%). Fertant ch'ina stgarsa maioritad da las persunas en vegliadetgna mesauna veglian approvar l'iniziativa, sajan persunas tranter 18 e 39 onns il mument plitost cunter, er qua cun ina maioritad stgarsa.
Tenor l’institut gfs.berna è il resultat avert: La situaziun actuala pledescha per in stgars Gea – tar iniziativas sa mida dentant la tenuta savens anc vers in Na.
Iniziativa per ina Svizra senza pesticids sintetics
Quasi il medem maletg sa mussa er tar l'autra iniziativa agrara: 55% s’expriman per in scumond da pesticids sintetics. Ed anc ina parallela: Bleras persunas han gia fatg lur opiniun set emnas avant la votaziun, tar iniziativas dal pievel n'è quai betg usità. Perquai vegn l’institut da perscrutaziun a la medema conclusiun: Tge che la Svizra decida ils 13 da zercladur è anc avert.
I vegnia interessant da persequitar sche questas duas iniziativas agraras sa sviluppian sumegliant ubain sch’ina (plitost l’iniziativa per aua netta) survegn dapli sustegn.
Pli clera para la situaziun tar la lescha da Covid-19: Da las persunas dumandadas din 67% Gea. Quai saja in plimatsch agreabel, constateschan ils politologs e las politologas. Cunter la lescha èn surtut persunas datiers da la Partida populara Svizra e persunas criticas envers la regenza. Sch’il cumbat da votaziun sa sviluppescha normal, èsi da quintar cun in Gea ils 13 da zercladur. Tuttina è l’institut precaut: Ins na sappia mai tge dinamicas ed emoziuns che la crisa da corona sveglia anc.
Sch’i fiss vegnì votà gia la fin d’avrigl, avessan 60% acceptà la lescha da CO2. Il muster è cler: La sanestra sustegna la lescha – la dretga refusa quella. Tranter sutgas e bancs èn surtut persunas datiers a la Partida liberaldemocratica. L’argument principal per votar Gea è d’agir cunter la midada dal clima – per in Na pleda surtut che stgaudar ed ir cun auto vegn pli char. Il scenari il pli probabel per ils 13 da zercladur: La Svizra accepta la lescha da CO2.
67% da las persunas dumandadas acceptan la lescha per cumbatter il terrorissem. Tar questa fatschenta dat dentant en egl che dapli votantas e votants n’han anc betg ina clera opiniun (9%). La pli gronda acceptanza è da chattar tar la politica dal center. In cuntrast sa mussa dentant tar ils verd-liberals: 70% vulan metter in Gea en l’urna – la partida ha dentant decis la parola Na. L’institut da perscrutaziun quinta che la Svizra accepta ils 13 da zercladur questa lescha.
Interess surproporziunal
Actualmain èsi da quintar che 52% van a votar ils 13 da zercladur. Quai è sur la media dals ultims 10 onns (46%). Ina raschun saja che las tschintg votaziuns cuntegnian temas fitg differents e sveglian perquai era l’interess tar differentas gruppas en la societad, concluda gfs.berna. Gia a las votaziuns dal settember 2020 e dal mars passà eran dapli votantas e votants sa participads.