Siglir tar il cuntegn

Header

Las opiniuns van dapart puncto pretschs d'abitar a Cuira.
Legenda: Las opiniuns van dapart puncto pretschs d'abitar a Cuira. RTR, Federico Belotti
cuntegn

Abitaziuns pajablas a Cuira? Associaziun da locataris: «I n'è propi betg capità bler»

Quatter onns suenter ch'ils da Cuira han ditg Na a l'iniziativa per dapli spazi d'abitar pajabel van las opiniuns anc adina dapart. Ils iniziants da lura manegian ch'i na saja betg capità bler, la citad percunter è da l'avis ch'i saja vegnì fatg avunda.

Avant quatter onns han ils da Cuira gì da votar davart in'iniziativa che vuleva dapli spazi d'abitar pajabel. Els han tramess ella da l'aua giu – pervi dad 86 vuschs dapli ch'han ditg Na. In resultat da casualitad aveva l'iniziant e president da l'associaziun per locataris, Lukas Horrer, ditg quella giada. Quai muntia uss per la citad ch'ella na possia betg far vinavant sco enfin qua. Uss quatter onns pli tard è Lukas Horrer dischillus; i na saja betg propi capità bler en quel temp. Ils tschains sajan en media anc adina memia auts en la chapitala.

I n'è propi betg capità bler davart da la politica.
Autur: Lukas HorrerIniziant e president da l'associaziun da locataris

Auter vesa quai il president da la citad Urs Marti. El è da l'avis che la citad haja prendì avunda mesiras. La finala haja la citad construì ina surbajegiada cun pretschs flexibels. Persunas ch'han il basegn pon survegnir in rabat da fin 25%.

Blers han ditg: Nus na vulain gnanc far midada, perquai che nus na vulain betg dar or dapli daners per abitar malgrà che nus pudessan.
Autur: Urs Martipresident da Cuira

Sper quai saja sa mussà tar quella surbajegiada che las abitaziuns n'èn betg uschè tschertgadas sco spetgà. Cunzunt er perquai che blers abitian gia uss e gia daditg èn abitaziuns pli veglias che sajan anc pli bunmartgadas che las novas da la citad – er sche quellas sajan bunmartgadas cumpareglià cun ils pretschs dal martgà. Perquai è Urs Marti da l'avis ch'i na dovria actualmain betg dapli mesiras davart da la citad.

Opiniuns èn restadas

Sut il stritg èn las opiniuns restadas las medemas: Lukas Horrer è da l'avis che la citad stuess far dapli per garantir dapli spazi d'abitar pli bunmartgà. Ed Urs Marti è da l'opiniun che la citad fa gia avunda e ch'i na dovra betg dapli mesiras.

RTR actualitad 12:00