Al conclus federal davart la finanziaziun da l’AVS sco era a la lescha davart la refurma da rentas 2020 avessan l’entschatta d’avust 53% dals dumandads ditg gea. A la refurma avessan 42% ed a la finanziaziun da l’AVS 41% ditg na. Anc betg decidì han 5% respectivamain 6%.
Schebain ch’ils dus projects da votaziun èn colliads al cuntegn e ch'in project dependa da l’auter, datti il mument anc persunas che han differentas opiniuns tar ils dus projects. 7% dals dumandads vulan acceptar la finanziaziun da l’AVS e refusar la refurma da rentas 2020. Ulteriurs 7% inditgeschan exact il cuntrari. 44% votassan uss congruent ubain plitost per omaduas propostas.
Tar ils simpatisants da las partidas PS, PCD e PES mussa la retschertga da gfs.bern ina clera maioritad per ils dus projects. Ils aderents da las partidas PPS e PLD èn cun ina stretga maioritad cunter il conclus e la lescha.
L’impurtanza dal cusseglier federal Alain Berset
Persunas ch'èn da l'idea ch'il cusseglier federal Alain Berset saja credibel voteschan cun ina maioritad da 65% gea. Las persunas che na chattan Berset vardaivel, voteschan percunter cun ina maioritad da 76% na. En tut fan dentant las persunas che na chattan il cusseglier federal betg vardaivel ora sulettamain 18%. Percunter èn 67% dals dumandads da l’opiniun che Berset saja vardaivel.
Ils arguments pro e contra
Ils ultims 20 onns han tut las refurmas da l'AVS ch'èn vegnidas iniziadas fatg naufragi. 71% dals dumandads èn perquai da l'opiniun ch'i saja uss temp per in cumpromiss. In ulteriur argument per ils dus projects è che persunas cun entradas bassas e medias profitassan da la refurma da las rentas 2020.
L'argument dals adversaris ch'era persunas che n'han betg da basegns d'ina renta pli auta, profitassan dals dus projects da votaziun, persvada cun 59% il pli ferm. In ulteriur argument impurtant cunter la refurma è che quella engrevgiass memia ferm ils giuvens.
Segirezza alimentara
L’entschatta d’avust avessan 65% dals votants e las votantas ditg gea u plitost gea al conclus federal davart la segirezza alimentara. 18% fissan stai cunter la segirezza alimentara e sulettamain 17% anc indecis. La maioritad da las persunas ch’han participà a la retschertga quintan che quai project da votaziun vegni acceptà da la populaziun svizra.
La segirezza alimentara chatta tar ils simpatisants da las partidas PLD e PPS ils pli blers aderents. Ils simpatisants da la partida PES e quels che voteschan senza sa drizzar a partidas èn cun 59% il pli pauc persuenter.
Promover la producziun da vivondas svizras
L’argument il pli popular per la segirezza alimentara è da promover la producziun da vivondas svizras. 79% dals participants da la retschertga han confirmà quai. E 63% suondan l’argumentaziun che la segirezza alimentara garanteschia il svilup ecologic da l’agricultura.
RR novitads 06:00