La lescha da Covid-19, che valess enfin la fin da l’onn, è numnadamain la basa giuridica per ils agids finanzials che la Confederaziun porscha a persunas, firmas e branschas che pateschan pervia da las restricziuns da la pandemia. Vinavant èn era ils agids finanzials dals chantuns, che sa basan sin la Confederaziun, pertutgads. In Na a l'urna, muntass che quels programs d'agid vegnissan stritgads davent dals 25 da settember, declera il cusseglier guvernativ e manader dal Departament da finanzas chantunal, Christian Rathgeb.
Dependenza federala
Pertge ils daners da la Confederaziun, che metta a disposiziun la gronda part per ils programs d'agid, crudassan davent. En cifras concretas surprenda la Confederaziun 158 milliuns dals 200 milliuns ch’il chantun ha empermess. E quella summa na vegniss il chantun Grischun betg da pajar, di il Departament chantunal da finanzas sin dumonda da RTR. Uschia ch'il Grischun è dependent da la Confederaziun
Lescha da Covid-19 betg il medem sco lescha d’epidemia
Christian Rathgeb accentuescha ch’i saja impurtant da savair, che la lescha da Covid-19 n’è betg il medem sco la lescha d’epidemia. La lescha da Covid-19 haja da far nagut cun las restricziuns. Il cuntrari:
L’agid finanzial è gist qua per minimar las consequenzas entras restricziuns, sco per exempel serrar las ustarias. Perquai dovri era quella lescha. Uschiglio restan tut tenor las restricziuns, sin basa da la lescha d’epidemia, e da l’auter maun crodan ils programs d’agid davent.
In Na na midia nagut vidlonder ch'il Cussegl federal sappia far restricziuns, di Christian Rathgeb.
Consequenzas ord vista chantunala
Pia, sche la lescha da Covid-19 vegniss refusada, pudess quai avair grevas consequenzas, di il chantun. Pertge il chantun Grischun na pudess betg surprender tut ils custs e sustegnair las Grischunas ed ils Grischuns senza l'agid finanzial da la Confederaziun.
Tge branschas che fissan pertutgadas il pli fitg d’in Na, na po il Departament da finanzas anc betg dir. Tranter auter en mintga cas las ustarias, ils hotels ed autras branschas che han gì da serrar ditg lur portas.