Siglir tar il cuntegn

Header

cuntegn

Votaziuns Construcziun dischordinada – la votaziun dals 10 da favrer

Mintga di vegn surbajegiada en Svizra ina surfatscha verda d’ina grondezza dad otg plazzas da ballape. L’iniziativa cunter la construcziun dischordinada vul franar quai svilup.

Per far frunt a la construcziun dischordinada ha il suveran svizzer vuschà l’onn 2013 per la lescha davart la planisaziun dal territori. Quella vul franar il svilup e prescriva che zonas da construcziun dastgan cumpigliar mo pli tant terren, sco quai ch’i vegn probablamain duvrà entaifer 15 onns. Zonas memia grondas ston vegnir reducidas.

L'iniziativa dal pievel «Franar la construcziun dischordinada - per in svilup durabel dals abitadis (Iniziativa cunter la construcziun dischordinada)» ch'ils Giuvens Verds han inoltrà l'onn 2016, vul mesiras pli severas.

Ella vul bloccar la surfatscha totala da las zonas da construcziun en Svizra. Zonas da construcziun novas dastgan vegnir creadas mo, sch'ina zona da construcziun d'almain la medema grondezza vegn abolida en in auter lieu.

L'iniziativa vul ultra da quai francar en la constituziun ils edifizis ed ils stabiliments che dastgan anc vegnir construids ordaifer las zonas da construcziun.

audio
Mezdi: Pro & contra da l'iniziativa construcziun dischordinada
ord Actualitad dals 22.01.2019.
laschar ir. Durada: 3 minutas 26 Secundas.

Text da l'iniziativa

Avrir la box Serrar la box

Art. 75 al. 4–7

4 En il rom da lur cumpetenzas procuran la Confederaziun, ils chantuns e las vischnancas per cundiziuns generalas favuraivlas per furmas d’abitar e da lavur durablas en structuras da pitschna dimensiun ch’èn caracterisadas d’ina auta qualitad da viver e da vias da communicaziun curtas (quartiers durabels).

5 Da persequitar è in svilup dals abitadis vers anen che correspunda ad in’auta qualitad da viver ed a disposiziuns da protecziun particularas.

6 Novas zonas da construcziun dastgan vegnir determinadas mo, sch’ina autra surfatscha betg impermeabilisada d’almain la medema grondezza e d’ina valur da rendita agricula potenziala cumparegliabla vegn dezonada da la zona da construcziun.

7 Ordaifer la zona da construcziun dastgan vegnir permess unicamain edifizis e stabiliments ch’èn dependents dal lieu e destinads a l’agricultura dependenta dal terren u edifizis ch’èn dependents dal lieu e d’in interess public. La lescha po prevair excepziuns. Edifizis existents giaudan la garanzia d’existenza; els dastgan vegnir engrondids minimalmain e lur utilisaziun dastga vegnir midada minimalmain.

Plinavant pretenda ella che surfatschas gia surbajegiadas vegnian utilisadas meglier. La Confederaziun, ils chantuns e las vischnancas stoppian ultra da quai promover furmas durablas d'abitar e da lavurar.

L'idea dals iniziants

Tenor ils Giuven Verds destruescha la construcziun dischordinada nunfranada la natira e la cuntrada. Uschia giaja era a perder terren cultivabel per l'agricultura. L'iniziativa procuria che la cuntrada e la qualitad da viver restian mantegnidas. Ella cumpenseschia las mancanzas da la revisiun da la Lescha davart la planisaziun dal territori e pussibiliteschia in'utilisaziun economica dal terren.

Arguments cunter l'iniziativa

Era ils adversaris da l'iniziativa èn da l'avis ch'igl è impurtant da schanegiar la natira e la cuntrada. L'iniziativa na servia dentant betg a la Svizra. In stop rigurus da las zonas da construcziun na tegnia betg quint als basegns da la populaziun e da l'economia. Era las differenzas tranter ils chantuns e las regiuns da la Svizra na vegnian betg resguardadas. Nua che terren da construcziun daventia stgars, creschia il privel ch'ils pretschs d'abitaziuns s'augmentian e che interpresas na possian betg pli sa sviluppar.

RR actualitad 12:00

Artitgels legids il pli savens