En Svizra dettia gia oz avunda abitaziuns pajablas ed ils tschains bas hajan era procurà per bleras abitaziuns novas, uschia che la schelta per las locatarias ed ils locataris saja gronda en Svizra. Per il cusseglier federal Guy Parmelin è perquai cler, l’iniziativa na dovri betg. La quota da 10% saja perfin nuschaivla e possia avair effects negativs. «Il risico è ch’ins investescha en tscherts lieus nua ch’i n’è betg necessari.»
L’iniziativa «Dapli abitaziuns pajablas» ch’è vegnida lantschada da l’Associaziun svizra dals locataris pretenda che la Confederaziun promovia ensemen cun ils chantuns la construcziun d'abitaziuns favuraivlas. Almain 10% da las abitaziuns novas stoppian esser en il possess d’organisaziuns che s’engaschan per la construcziun d'abitaziuns d’utilitad publica.
Cuntanscher quella finamira vulan ils iniziants cun scriver in dretg da precumpra per chantun e vischnancas en la Constituziun federala. Ultra da quai pretenda l'iniziativa ch'il sustegn finanzial da sanaziuns da bajetgs, per exempel per megliurar la bilantscha energetica, na dastga betg avair l'effect che abitaziuns favuraivlas daventan pli charas ed uschia betg pli pajablas per famiglias cun entradas bassas.
Problem per strategia d'energia
Gist quai pericliteschia dentant la finamira da la strategia d'energia 2050 da la Confederaziun, avertescha Guy Parmelin. Quella quinta cunzunt tar las chasas ed abitaziuns cun in grond potenzial da spargn che na dastgia betg vegnir mess en dumonda cun restricziuns novas. Ultra da quai profiteschian era ils locaturs da quellas sanaziuns, è el persvadì. «Natiralmain s’augmentan ils tschains da locuziun levet suenter la sanaziun. Ma persuenter sa sbassan uschia era ils custs accessorics»
250 milliuns sco cuntraproposta indirecta
Ch’i dovra dentant era in tschert agid finanzial da vart da la Confederaziun vesa era il minister d'economia. Il sustegn per la construcziun d’abitaziuns d'utilitad publica saja sa cumprovà e duaja cuntinuar. Il Parlament ha perquai decidì in credit general da 250 milliuns francs, quai per ils proxims diesch onns. Cun quels daners possian ins sustegnair là nua ch'i fetschia era senn, di Parmelin.
In crutsch datti dentant. Ils daners supplementars per cuntinuar cun il sustegn per la construcziun d’abitaziuns d'utilitad publica datti mo, sche las Svizras ed ils Svizzers dian NA a l'iniziativa ils 9 fa favrer 2020.
RTR novitads 12:00