Siglir tar il cuntegn

Header

cuntegn

Duas giadas Gea, ina giada Na Parolas da Partida verd-liberala

Delegadas e delegads da la Partida verd-liberala (PVL) han decis las ultimas duas parolas per las fatschentas che vegnan ils 13 da zercladur a l'urna.

Gea a la lescha da CO2 ed a la lescha da Covid-19. E Na a la lescha per cumbatter il terrorissem. Las decisiuns sajan mintgamai stadas cleras.

Gea, Gea e Na – mintgamai cler

Bunamain unanimamain ha PVL decis a la radunanza la parola Gea per la lescha da CO2. Quella pussibiliteschia da far in pass impurtant direcziun protecziun dal clima, ha la partida annunzià. Quella rinforzia l'economia sco er la mastergnanza e dettia impuls fairs, pertge ina gronda part da las taxas da CO2 giaja enavos a la populaziun.

In cler Gea hai er dà per la lescha da Covid-19. Ord vista da la PVL furma quella la basa per las mesiras durant la pandemia, sajan quai talas che pertutgan la sanadad u l'economia. Cun la lescha da Covid-19 possian ins segirar il sustegn per interpresas pertutgadas.

In cler Na ha la PVL decis pertutgant la lescha anti-terror. Quella attatgia il stadi da dretg sco er valurs liberalas, hai num. Formulaziuns che na sajan betg cleras e nettas avrian la porta interpretaziuns arbitraras.

Parolas gia decididas

Las parolas per ils ulteriurs projects da votaziun avevan delegadas e delegads gia decis il favrer: Gea a l'iniziativa per aua da baiver netta e libertad da votar per l'iniziativa da pesticids.

RTR novitads 18:00

Artitgels legids il pli savens

Scrollar a sanestra Scrollar a dretga