Siglir tar il cuntegn

Header

cuntegn

Votaziuns Ils pass suenter la votaziun

Mo in per dis suenter la votaziun ha il chantun Grischun installà ina task force per sclerir tuttas dumondas per realisar l'iniziativa da las segundas abitaziuns.

Task force per realisar iniziativa

Mo in per dis suenter la votaziun ha il chantun Grischun installà ina task force per sclerir tuttas dumondas per realisar l'iniziativa da las segundas abitaziuns. Quai communitgescha la chanzlia chantunala ils 15-03-2012. Manada vegn quella da cusseglier guvernativ Hansjörg Trachsel. La task force tschertga cun auters chantuns da muntogna pussaivladads da realisar l’iniziativa a moda e maniera pragmatica.

Era la confederaziun incarichescha ina gruppa da lavur per elavurar las directivas necessarias per pudair realisar l’iniziativa. Sco emprim stoppia vegnir sclerì l’interpretaziun da la noziun “abitaziun secundara”. En quella gruppa da lavur represchentan il cusseglier guvernativ Hansjörg Trachsel e la deputada dal cussegl grond Silvia Casutt-Derungs il Grischun.

Moziuns per sclerir malsegirtads

Ina chombra dal parlament.
Legenda: Inoltrà moziun en omaduas chombras dal parlament. Keystone

Il cusseglier naziunal Heinz Brand da la Partida populara svizra (PPS) ha inoltrà en il cussegl naziunal ina moziun che pretenda ch’i saja da dar lubientschas da bajegiar abitaziuns secundaras enfin la fin da l’onn tenor dretg actual. La medema moziun ha Martin Schmid da la Partida liberaldemocrata (PLD) inoltrà en il cussegl dals chantuns.

Las moziuns duain far squitsch a la confederaziun, per ch’ella sclereschia immediat las malsegirtads ch'i dat en connex cun l'interpretaziun da l'iniziativa. Quai pertutga en emprima lingia il temp transitoric, avant che l'iniziativa va en vigur.

Remplazzar chasas veglias per gidar l'economia da construcziun

Chasa veglia cun ina stalla.
Legenda: Remplazzar chasas veglias. RTR, M. Demont

Il Forum economic dal Grischun propona duas mesiras, co realisar l'iniziativa d'abitaziuns secundaras. I dovria la pussaivladad da remplazzar bajetgs vegls. Uschia survegnia l'economia da construcziun lavur nova ed ins possia megliurar il maletg dals vitgs.

Plinavant duain las vischnancas incassar en il futur ina taglia dals possessurs d'abitaziuns secundaras existentas. Quai per cumpensar las entradas che crodian pervi.

Abitaziuns da dimorants durant l’emna n’èn betg abitaziuns secundaras

En Svizra na ston dimorants durant l'emna betg temair che lur domicil durant l’emna valia sco abitaziun secundara. Quai propona la gruppa da lavur, che ha d’elavurar co che la lescha davart abitaziun secundaras duai vegnir applitgada.

Ina abitaziun vala sco abitaziun secundara, sche las persunas ch’abiteschan là n'han betg las scrittiras en quest lieu. Da nov betg pertutgadas da la lescha èn abitaziuns ch'èn necessarias per raschuns da professiun ubain per furmaziun, communitgescha l'uffizi federal per planisaziun dal spazi. Era bajetgs ch'avevan pli baud in intent agricul, sco per exempel aclas e rustici, duain esser exclus da questa lescha.

Ordinaziun va pir 2013 en vigur

Purtret da la cussegliera federala Doris Leuthard.
Legenda: Cussegliera federala Doris Leuthard explichescha a las medias la decisiun davart l'ordinaziun per abitaziuns secundaras. Keystone

Il Cussegl federal ha decidì da metter en vigur sin l'emprim da schaner 2013 l'ordinaziun che reglescha per ils proxims onns l'applicaziun da l'iniziativa da Franz Weber. Ils iniziants avessan preferì da metter en vigur l'ordinaziun gia sin l'emprim da settember.

Il Cussegl federal lubescha era pliras excepziuns per vischnancas cun ina cumpart da 20 pertschient e dapli. Quellas dastgan vinavant lubir la construcziun d'abitaziuns secundaras, sch'i sa tracta da letgs chauds.

Abitaziuns ch'èn vegnidas construidas avant ils 11 da mars dastgan vinavant vegnir transfurmadas d'emprimas abitaziuns en abitaziuns secundaras. Possessurs che vendan lur emprima abitaziun sco abitaziun secundara na dastgan dentant betg construir enstagl da quai ina nova chasa u abitaziun.

L'ordinaziun vala per ils proxims trais, quatter onns, enfin ch'il Parlament federal ha elavurà ina lescha. Auter che tar ina lescha èsi tar in'ordinaziun dentant pussaivel che dretgiras pon examinar e schizunt abolir permiss da construcziun.

Reacziuns

Il cussegl federal haja capitulà avant la lobby da construcziun, uschia ha ditg Vera Weber, la figlia da Franz Weber en in'emprima reacziun sin la decisiun dal cussegl federal. Ils iniziants teman ussa che bleras vischnancas lubeschian enfin la fin da l'onn anc bleras segundas abitaziuns.

Quant’influenza politica dessan avair possessurs d’abitaziuns secundaras?

Surlej.
Legenda: Surlej. mad

En las discussiuns davart abitaziuns secundaras èn stadas en il center quest ultim temp savens las dumondas: Tgi dastga fabritgar quant, nua e quant ditg anc? La marella mida perspectiva e dumonda: Tgi èn ils possessurs d’abitaziuns secundaras e quant bain èn els integrads en ils vitgs? E surtut interessa la dumonda: Quant ferm lessan e dastgan possessurs d’abitaziuns secundaras intervegnir sin nivel politic? Cler è ch’els n’han betg blers dretgs, ma ina vusch cun pais. Respostas pertge che quai è uschia dattan ils resultats d’in studi da Grischconsulta ed exponents da La Punt - Chamues-ch e Silvaplauna.

Artitgels legids il pli savens