Da tge sa tracti?
Questa iniziativa vul introducir ina taglia naziunala sin l’ierta e sin donaziuns. La tariffa da taglia per iertas e per donaziuns duai importar 20 pertschient, ma ils emprims 2 milliuns francs da l’ierta u da la donaziun duain esser deliberads da la taglia. Dus terzs dal retgav duain ir a l’AVS, in terz als chantuns. Las taglias chantunalas sin l’ierta e sin donaziuns vegnissan abolidas.
La dumonda da votaziun
Vulais Vus acceptar l’iniziativa dal pievel «Far pajar taglias sin iertas da milliuns per finanziar nossa AVS (Refurma da la taglia sin l’ierta)»?
Dapli
Ils arguments dals aderents
- Iertas succedan senza atgna prestaziun. Ch’ins sto pajar taglia sin iertas è fair e procura per ina repartiziun pli gista dal possess.
- L’iniziativa na introducescha nagina nova taglia. Ella è ina refurma che abolescha las imposiziuns da taglia intransparentas dal chantun.
- Chantuns survegnan ina indemnisaziun da la Confederaziun e na ston betg avair tema d’entradas pli pitschnas.
- La AVS survegn uschia 2 milliardas francs dapli ad onn è po uschia vegnir sanada.
Ils arguments dals adversaris
- L’iniziativa abolescha la suveranitad da taglia dals chantuns ed è ina attatga sin il principi da federalissem da la Svizra.
- Chantuns ston quintar cun damain entradas, quai che munta in augment da la taglia.
- La taglia sin l’ierta periclitescha las interpresas da famiglia. Ils levgiaments da taglia empermess n’èn betg definids e procuran per intschertezza.
- Blera lavur birocratica tar in gea a l'iniziativa
Recumandaziun a votantas e votants
Il Cussegl federal ed il parlament refusan l’iniziativa. Il Cussegl naziunal ha refusà l’iniziativa cun 135 cunter 60 vuschs ed 1 abstenziun, il Cussegl dals chantuns cun 34 cunter 9 vuschs e 2 abstenziuns.
