Siglir tar il cuntegn

Header

cuntegn

Iniziativa fair-food Per tge vai?

Victualias producidas a moda ecologica e faira sco era tenor ils basegns dals animals duain vegnir promovidas da la Confederaziun. Per quest intent duai dar prescripziuns per la producziun en Svizra ed era per ils products che vegnan importads da l'exteriur.

Ils 26 da november 2015 han ils Verds inoltrà l’iniziativa dal pievel «Per victualias saunas sco er producidas a moda ecologica e faira (Iniziativa da fair-food)». Els pretendan ch’i vegn agiuntà in artitgel supplementar a la Constituziun federala davart las victualias.

Text da l'iniziativa

Avrir la box Serrar la box

Art. 104b Victualias

1 La Confederaziun rinforza la purschida da victualias ch’èn da buna qualitad e segiras e che vegnan producidas en moda ecologica, cun schanegiar las resursas, tenor ils basegns dals animals e sut cundiziuns da lavur fairas. Ella fixescha las pretensiuns a la producziun ed a l’elavuraziun.

2 Ella garantescha che products agriculs importads, che vegnan duvrads sco victualias, adempleschan da princip almain las pretensiuns tenor l’alinea 1; per victualias elavuradas pli ferm e cumponidas sco er per pavel prenda ella en egl questa finamira. Ella subvenziunescha products importads che derivan d'in commerzi fair e da manaschis purils che cultiveschan il terren.

3 Ella procura ch’ils effects negativs dal transport e da la magasinaziun da victualias e da pavel per l’ambient e per il clima vegnian reducids.

4 Ella ha spezialmain las suandantas cumpetenzas ed incumbensas:

a. Ella relascha prescripziuns davart l’admissiun da victualias e da pavel e davart la decleraziun da lur moda da producziun e d’elavuraziun.

b. Ella po reglar la concessiun da contingents da duana e graduar ils dazis d’import.

c. Ella po far cunvegnas da finamiras liantas cun la branscha da victualias, en spezial cun importaders e cun il commerzi en detagl.

d. Ella promova l’elavuraziun e la commerzialisaziun da victualias producidas en moda regiunala e stagiunala.

e. Ella prenda mesiras per limitar il sguaz da victualias.

5 Il Cussegl federal fixescha finamiras a media ed a lunga vista e fa regularmain in rapport che mussa, quant enavant che las finamiras èn vegnidas cuntanschidas. Sche questas finamiras na vegnan betg cuntanschidas, prenda ella mesiras supplementaras u rinforza las mesiras existentas.

L’idea dals iniziants

L’iniziativa vul promover meglier l’agricultura persistenta ed augmentar la qualitad da las victualias importadas. Ella procura che las victualias stagiunalas da la regiun hajan in avantatg sin il martgà, promova cundiziuns da lavur gistas, reducescha il sguaz da victualias, rinforza il bainstar dals animals e meglierescha la protecziun da la natira.

Arguments cunter l’iniziativa

Per il Cussegl federal ed il parlament è l’iniziativa nunnecessaria: La Svizra fa gia bler per victualias segiras e producidas en moda persistenta. Ella dispona da las basas constituziunalas necessarias per rinforzar la purschida da talas victualias. L’iniziativa po ultra da quai chaschunar conflicts cun cunvegnas internaziunalas, e la controlla fiss difficila.

Situaziun actuala

La Svizra producescha sezza var la mesadad da ses basegn da victualias. Questas victualias ston ademplir pretensiuns severas, per exempel areguard la segirezza, areguard la qualitad ed areguard la persistenza. L’import da victualias ha la Svizra reglà en differentas leschas ed en cunvegnas internaziunalas.

RR votaziuns dals 23-09-2018

Artitgels legids il pli savens