Siglir tar il cuntegn

Header

audio
S'augmentassan ils pretschs per products agrars tar in Gea a las duas iniziativas?
Or da Actualitad dals 10.05.2021.
laschar ir. Durada: 04:56 minutas.
cuntegn

Iniziativas agraras Consequenzas per consumentas e consuments tar in Gea

In Gea a las iniziativas agraras n’avess betg be consequenzas per las puras ed ils purs, mabain er per consumentas e consuments.

Products pli chars

Expertas ed experts, sco era la cuminanza d'interess per commerzi en detagl, nau che Migros, Coop e Denner s'auda vitiers, ed il Volg conferman envers RTR, ch'els van da quai anora ch’ils pretschs per ils products indigens vegnan a vegnir pli chars. Differents adversaris da las iniziativas quintan cun in augment da 30%. Tenor expertas ed experts na constettia quai betg. La cifra saja memia auta. Con dapli che consumentas e consuments vegnan a stuair pajar per ils products indigens saja grev da dir, manegian economas ed economs, quai dependia da blers facturs.

Tranter auter da la relaziun tranter dumonda e purschida. Pia con blers products ch’i vegn ad avair e con grond che l’interess da las consumentas ed ils consuments è.

Damain products

Expertas ed experts quintan cun ina pli pitschna racolta sche las iniziativas agraras vegnan acceptadas. Il Volg è da l'avis ch’il sortiment regiunal na vegnia lura betg pli a tanscher per tuttas e tuts. Quai munta che la Svizra stuess importar dapli e che las consumentas e consuments stuessan cumprar dapli products da l'exteriur. Ch'i vegnia dentant a dar stretgas da products en general na crain expertas ed experts dentant betg.

Damain «food waste»

In punct che las iniziantas ed ils iniziants numnan gugent è, ch’i vegnia a dar damain «food waste». Tenor differents studis, bitta la Svizra davent radund in terz da tut las mangiativas. Entras las iniziativas pudessi esser ch’era products che n'èn betg uschè bels, per exempel carottas crutschas u peperonis defurmads, chattan in plaz en ils regals. Uschia na vegnia betg bittà davent tant ed i dess dapli products, uschia ils arguments. Ma qua van las opiniuns dapart.

Consumar svelt products da bio

Damai che products da bio na vegnan betg u strusch tractads cun pesticids, na pon els era betg vegnir conservads uschè ditg. Quai munta ch’ins sto ir a far cumissiuns pli regularmain, dentant sajan ils legums era frestgs, dian aderentas ed aderents.

RTR actualitad 12:00

Artitgels legids il pli savens

Scrollar a sanestra Scrollar a dretga