Curt e concis
- Anc din las Svizras ed ils Svizzers Gea a l’iniziativa da fair-food – quai dentant cun be 53%. Sche quest trend cuntinua è in Na ils 23 da settember probabel.
- Il medem moviment datti er tar l’iniziativa da la suveranitad alimentara: Er quella fiss be pli vegnida acceptada da 49% da las Svizras e dals Svizzers.
- 69% avessan votà per il conclus federal davart las vias da velo.
En general mussan las respostas da las Svizras e dals Svizzers a la segunda enquista da gfs.berna in cler maletg: Tar tut las trais fatschentas han las posiziuns dal Cussegl federal e dal parlament gudagnà sustegn dal suveran. In svilup, che correspunda al svilup normal da l’opiniun durant in cumbat da votaziun en Svizra.
Iniziativa da fair-food perda simpatisants
Dapi l'emprim’enquista ha mintga quarta persuna midà sia opinun: En la segunda enquista han ils aderents da l’iniziativa da fair-food pers 25 puncts pertschientuals – be anc 53% dals votants avessan ditg Gea a l'iniziativa.
Pli ch’il suveran sa fatschentia cun il tema e pli critic ch’el vegnia, han eruì ils scienziads da gfs.bern. Ils arguments pli ferms cunter l’iniziativa hajan da far cun ils raps: Uschia temia il suveran conflicts economics, mangiativas pli charas e memia blera birocrazia.
Aderentas ed aderents da l’iniziativa dettia quai anc tar la sanestra e circuls critics envers il consum da charn. Ma er quels vegnian tschiffads dal trend ad in Na. Sch’il trend cuntinua en questa intensitad concludan ils scienziads, ch’in Na ils 23 da settember è probabel.
Trend a Na er tar l’iniziativa per la suveranitad alimentara
Er la segunda iniziativa che sa fatschenta cun victualias perda pli e pli il sustegn dal suveran. Be anc 49% da las Svizras e dals Svizzers sustegnessan l’iniziativa per la suveranitad alimentara – ed er qua han ils aderents pers vuschs, numnadamain 26 puncts procentuals.
Sco tar l’iniziativa fair-food sajan er tar questa iniziativa las atgnas disas da sa nutrir impurtantas: Pli bler ch’in mangia charn, pli ferm ch’el saja cunter l’iniziativa per la suveranitad alimentara, ha eruì l’enquista da gfs.berna.
Las duas iniziativas alimentaras han anc in’autra parallela. Omaduas hajan sviluppà in ferm trend envers in Na. Sch’i giaja vinavant uschia, saja il Na a l’urna ils 23 da settember probabel, resumescha gfs.berna en sia enquista.
Gea als velos
Il sustegn per il conclus federal davart las vias da velo è anc ina giada creschì – e quai per 5 puncts procentuals sin 69%. Ils arguments ils pli ferms per in Gea sajan actualmain ils avantatgs dad ina coordinaziun centrala per las vias da velo e damain squitsch per autras furmas da traffic.
Ils cunterarguments perdian ed ils pensiers pervi dals custs sa reduceschian. Tant l’opposiziun che vegn oravant tut da la Partida populara svizra PPS, sco er d'auters circuls critics envers il velos, n’hajan betg gì success.
Perquai – e sche tut giaja sco usità – concludan ils scienziads da gfs.berna, ch’il conclus federal davart las vias da velo vegnia acceptà ils 23 da settember cun in’auta maioritad da radund dus terzs da las vuschs.
Enquista sin incumbensa da la SRG SSR
L’enquista ha la societad svizra da retschertgas gfs.berna fatg sin incumbensa da la SRG SSR. Per l’enquista han ins dumandà 1400 votantas e votants, quai tranter ils 29 d'avust ed ils 5 da settember 2018. La quota d’errur è tar +/- 2.7%.
Plinavant fan ils auturs da l'enquista attent, che quels resultats mussan la situaziun mumentana da 15 enfin 20 dis avant la votaziun federala e na sajan betg ina prognosa.
RR novitads 06:00