Siglir tar il cuntegn

Header

cuntegn

Votaziuns La posta grischuna ed il «service public»

L'iniziativa «pro service public» procura per discussiuns. E tge sa midass en noss chantun tar in «gea» a l'iniziativa? In exempel: la posta en il Grischun.

Il ticket dal tren vegn adina pli char, las postas svaneschan ina suenter l'autra, persuenter gudagnan ils managers in nas d'aur. Quai èn ils arguments dals iniziants da l'iniziativa «pro service public». Perquai vulan els, che interpresas federalas sco la posta, la SBB e la Swisscom na duain betg pli esser orientadas vida far gudogn.

Ils adversaris da l'iniziativa dian, che quai saja in tagl en l'atgna charn. Sche in'interpresa na possia betg pli far in grond gudogn, n'haja ella era betg daners per novas investiziuns. En consequenza stoppia ella reducir il service.

grafica cun petta
Legenda: 58% da las persunas dumandadas avessan ditg gea u plitost gea a l'iniziativa davart il service public, sch'i fiss vegnì votà mez avrigl. RTR RTR

Politica è cunter

En la politica èn tuts cunter l'iniziativa: tant il cussegl federal sco er il cussegl naziunal, il cussegl dals chantuns, tut las partidas, las uniuns ed ils sindicats. La populaziun para dentant dad avair simpatia per las pretensiuns da l'iniziativa, ch'èn ditg curt cun ils pleds dals iniziants «dapli service per in prezi pli bass». L'ultim trend da l'institut GfS a Berna mussa, che 58% da la populaziun sustegness l'iniziativa.

«L'iniziativa na spendra betg filialas da la posta»

audio
Bunura: Quai munta l'iniziativa per service public per la posta
ord Novitads dals 19.05.2016.
laschar ir. Durada: 3 minutas 34 Secundas.

In argument dals initiants è, ch'il service public vegnia adina menders. Per exempel hajan ils ultims onns adina dapli postas stuvì serrar. Quai saja dentant betg da main service public, mabain quai saja simplamain adattà il service als giavischs dals clients, di Oliver Flüeler, pledader da medias da la posta. Las frequenzas sin las postas sajan idas enavos perquai che bleras persunas scrivan mails ubain fan pajaments online. E per pudair garantir in'offerta cun uras d'avertura favuraivlas, hajan ins midà bleras filialas en agenturas ch'èn per exempel integradas en la butia dal vitg, aschunta Flüeler.

In secund argument dals iniziants èn ils daners. Las pajas autas dals managers èn ina spina en lur egl. Service avant il gudogn, dian els. Per la posta grischuna fiss quai dentant in dischavantatg, di Flüeler. Be cun pudair far in gudogn, possian ins er investar en novas tecnologias. E be or dal grond gudogn da las citads, possian er ils chantuns perifers profitar.

RR actualitad bunura 06:00

Posiziun dal Cussegl federal cun cussegliera federala Doris Leuthard

audio
Mezdi: Posiziun dal Cussegl federal pertutgant iniziativa «pro service public»
ord Novitads dals 19.05.2016.
laschar ir. Durada: 3 minutas 58 Secundas.

Artitgels legids il pli savens