Revision Asylgesetz
Svizra: Revisiun da la lescha d’asil
-
GEA
1'616'286 Vuschs
-
NA
804'016 Vuschs
La Cussegliera federala Simonetta Sommaruga è cuntenta cun il resultat da la votaziun. Mo ella admonescha, ch'era en il futur vegnian damondas sco quella da co ir enturn cun carstgauns ord autras culturas a vegnir discutadas a moda emoziunala e cuntraversa.
La sanestra vesa ina terrada per la PPS
Tant ils socialdemocrats (PS) sco la Partida verda valeteschan il «Gea» cler a la revisiun da la lescha d'asil sco terrada per la Partida populara svizra (PPS): La politica da la partida cun la fracziun la pli gronda en chasa federala na correspundia betg a la veglia da la populaziun. Il «Gea» saja plinavant ina victoria per ina politica che vul schliar problems. Quai ha detg il cusseglier naziunal socialdemocrat da l'Argovia Cédric Wermuth en ina communicaziun.
PPS na vesa nagina terrada
Il president da la PPS Albert Rösti è dad auter avis e na vul betg dar in grond pais a la terrada a l'urna: «Quai n'è betg stà in plebiscit pro u contra PPS, mabain ina discussiun factica». Suenter il «Na» a l'iniziativa per in repatriament effectiv è la decisiun en favur da la revisiun da la lescha d'asil la segunda decisiun dal suveran svizzer quest onn cunter la parola da la PPS.
Ils chantuns han plaschair dal «Gea» a la revisiun. Il president da la conferenza da directurs da giustia dals Chantuns Hans-Jürg Käser ha detg envers la SDA ch'ils chantuns vegnian stgargiads entras ils process pli sperts en ils centers federals.
Cifras Grischunas
La midada da la lescha d'asil è vegnida acceptada dal suveran grischun. Quai cun 66,62% «Gea» cun cunter 33,38% «Na».
Per tge vai?
Per daventar pli effizienta vul la confederaziun eriger 16 centers d'asil spezials en ils quals tut las persunas involvidas en ina procedura d'asil duain esser reunidas en in lieu.
La PPS ha tschiffà il referendum cunter la midada. Per ella na va la revisiun betg avunda lunsch e la pussaivladad d’expropriar cuntrafetschia a la Constituziun federala. Plinavant èn ils adversaris da la midada da la lescha cunter il metter a disposiziun gratuitamain advocats a las persunas che dumondan per asil en Svizra.
RR novitads 15:00++