La revisiun da la lescha da chatscha na vegn betg tras. Il suveran svizzer refusa las midadas, er en connex cun la protecziun dal luf – cun 51,9% da las vuschs Na e 48,1% Gea. Questa dumonda contestada ha carmalà 59,3% dal suveran cun dretg da vuschar a l'urna.
Ils muntagnards pli u main unids
Plirs chantuns muntagnards sco il Grischun ed il Vallais han approvà fermamain la lescha da chatscha. Bleras vuschs per las midadas hai era dà en il chantun Uri ed en l'Appenzell Dadens. Ina tenuta positiva han era exprimì plirs chantuns da la Svizra Orientala e da la Svizra Centrala.
Berna cun autra decisiun
Il chantun Berna cun sias regiuns muntagnardas ha percunter refusà las midadas ch'avessan dà dapli pussaivladads per sajettar lufs. E per ferms Nas han procurà ils chantuns Turitg, Soloturn ed ils dus Basilea – sco era ina gronda part da la Svizra franzosa.
Lescha da chatscha
Svizra: Lescha da chatscha
-
GEA
1'530'811 Vuschs
-
NA
1'653'873 Vuschs
Il Grischun avess vulì schluccar la protecziun dal luf
Gia baud durant il di è sa mussà in ferm sustegn per la revisiun da la lescha da chatscha en il Grischun. E la finala han tut las vischnancas sustegnì las schluccadas era pertutgant il luf:
Zunt bler sustegn hai dà en la Surselva ed en il Puschlav. Ma era la Vallada dal Rain cun Cuira e las vischnancas vischinantas han approvà la lescha.
