Votaziuns - Nagin abandun anticipà d’energia nucleara

Survista

• Svizra: 54,2% na, 45,8% gea / participaziun a l’urna: 43%
• Grischun: 55,95% na, 44,05% gea / participaziun a l’urna: 43,57%

Cunter l’abandun da l’energia nucleara pretendì fin il pli tard il 2029 han vuschà 54% dals Svizzers. Atgnamain eran vegnidas concedidas bunas schanzas a l’iniziativa perquai ch’ella aveva mussà buns resultats tar enquistas. Tenor calculaziuns èn 45% dals votants svizzers sa participads a la votaziun.

audio

17:45 Berna – Reacziuns sin il na da Iniziativa per l’abandun da l’energia nucleara

04:33 min, ord Actualitad dals 27.11.2016.

laschar ir. Durada: 4 minutas 33 Secundas.

Scrottas da gea en Grischun

Las votantas ed ils votants dal Grischun n’han betg votà auter che la maioritad da la Svizra. Els han ditg in zic pli ferm na (+1,75%) ed èn sa participads in zic pli fitg vid la votaziun (+0,57%). Las pli fermas vuschs encunter l’iniziativa èn da chattar en Surselva.

En cumparegliaziun cun la Svizra croda en egl ch’ins chattà en l’entir chantun Grischun scrottas da gea. Quellas sa repartan il pli fitg en las valladas talianas, en il Grischun central, en l’Engiadina ed en la regiun da Cuira. La vischnanca cun il pli ferm gea e Verdabbio cun 67,5%.

Maioritad da chantuns era svelt segira

Claude Longchamp da l’institut da perscrutaziun gfs.bern di che la decisiun saja vegnida fatga en la Svizra tudestga. Consentiment per l’iniziativa hai percunter dà en la Svizra franzosa. Anc avant che la relaziun da las vuschs era enconuschenta sa mussava in na en la maioritad dals chantuns.

00:30

video

Co ha tgi vuschà?

Or da Telesguard dals 27.11.2016.

laschar ir. Durada: 30 Secundas.

Ils aderents dal referendum avevan fatg attent a l’auta vegliadetgna dals reacturs svizzers ed al ristg d’accidents nuclears. La regenza aveva avertì ch’in abandun memia svelt haja per consequenza che la Svizra stoppia importar electricitad nucleara e da charvun da l’exteriur.

Suenter l’accident nuclear da Fukushima il 2011 aveva la Svizra bain decis d’abandunar l’energia nucleara, dentant senz’in plan da temp.

2029 n'è betg la fin

Ils implants atomars duain restar en funcziun uschè ditg che l’Inspecturat federal da la segirezza nucleara valitescha els sco segir. Il project da votaziun pretendeva ch’ovras atomaras duain vegnir serradas suenter in temp da funcziun da 45 onns. Tenor quai stuessan las ovras Beznau I e II sco er Mühleberg vegnir deactivadas l’onn 2017. Gösgen giess giud la rait il 2024, Leibstadt il 2029.

Uss vai per la strategia d'energia 2050

Tenor ils iniziants è quai necessari da deactivar sveltamain ils reacturs. La finala possia quai dapertut dar ina catastrofa sco en il Giapun. Uss, suenter il resultat, pledan els da focussar la strategia d'energia 2050, ha ditg la presidenta dals Verds Regula Rytz envers Radio SRF. Cun il di dad oz saja la via libra per quest project.

audio

Reacziun da Doris Leuthard

00:15 min, ord Actualitad dals 27.11.2016.

laschar ir. Durada: 15 Secundas.

Per ils adversaris era l’urari da l'abandun memia giagliard. Uschia vegnia a mancar gia il 2017 in terz da l’electricitad nucleara, aveva ditg la ministra d’energia Doris Leuthard. La cumpart mancanta na possia betg vegnir remplazzada svelt avunda cun forza electrica ord energias regenerablas.

Suenter il resultat sa mussa Leuthard levgiada. Uss possian ins sa concentrar sin la strategia d'energia 2050.

Per la presidenta da la PLD Petra Gössi n'è quai dentant betg il cas. La debatta avant la votaziun na saja betg stada ina davart la strategia d'energia. Ed er cusseglier naziunal Christian Wasserfallen è da quest avis: «La glieud na vul savair nagut d'in abandun da l'energia nucleara.».

Il WWF reagescha en lingia cun la strategia d'energia 2050. Per els èsi uss cler che questa strategia sto vegnir manada a fin. Il na da la dumengia na saja betg in na tar «la midada sin il sectur da l'energia e tar l'abandun da l'energia nucleara».

RR novitads 16:00+