La campagna dals aderents para d'avair purtà fritg sulet en chantuns pli urbans.
Iniziativa per concerns responsabels
Svizra: Iniziativa per concerns responsabels
GEA
1'299'173 Vuschs
NA
1'261'673 Vuschs
Vuschs dals chantuns
- GEA
- Na
La finamira da l'iniziativa era che interpresas cun sedia en Svizra avessan stuì resguardar er en l'exteriur dapli prescripziuns areguard dretgs umans e la protecziun da l'ambient.
Cuntraproposta entra en vigur
Uss entra la cuntraproposta indirecta en vigur. Quella ha la ministra da giustia, Karin Keller-Sutter concepì ed il parlament deliberà la stad passada. Tenor quella lescha èn tschertas interpresas obligadas da rapportar da lur activitad en l'exteriur. Sch'i va per minerals da conflict e lavur d'uffants ston las interpresas resguardar dapli reglas. Surpassaments vegnan chastiads. Tenor il comité da l'iniziativa sa tracta quai d'ina «cuntraproposta d'alibi», pertge che quella desista d'ulteriuras reglas da responsabladad.
Grischun di Na cun 54,2 pertschient
La populaziun grischuna ha refusà l'iniziativa per concerns responsabels. Tenor il resultat definitiv han 54,2 pertschient da las votantas e dals votants grischuns ditg Na a l’idea che interpresas cun sedia en Svizra duain surpigliar responsabladad er en l'exteriur.
Questa carta illustrescha ils resultats da mintga vischnanca. Cun in clic sin la vischnanca cumpara il resultat da quella.
Cun passa 70 pertschient da las vuschs refusan las vischnancas Buseno (70,1 pertschient), Schluein (72 pertschient), Samnaun (72,2 pertschient), Tschiertschen-Praden (72,6 pertschient) e Furna (79,7 pertschient) l'iniziativa.
Per tge vai?
Concerns duain er surpigliar responsabladad en l’exteriur. L’iniziativa vul obligar ils concerns cun sedia en Svizra da respectar ils dretgs umans e la protecziun da l’ambient.