Il resultat definitiv è sin maisa: La maioritad dals chantuns (19,5 chantuns cunter 3,5 chantuns) sco er la maioritad da las votantas e dals votants (57,5 pertschient Na) han refusà l'iniziativa per scumandar la finanziaziun da material da guerra. Per il reussir da l'iniziativa avessan omaduas maioritads stuì sustegnair l'idea.
Iniziativa cunter affars cun material da guerra
Svizra: Iniziativa cunter affars cun material da guerra
GEA
1'081'731 Vuschs
NA
1'460'755 Vuschs
Vuschs dals chantuns
- GEA
- Na
AVS, cassas da pensiun, la Banca naziunala svizra e federaziuns dastgan vinavant investir en interpresas che fan daners cun material da guerra. Lantschà l'iniziativa aveva da la Gruppa per ina Svizra senz'armada (GsoA) ensemen cun ils Giuvens Verds.
«Success remartgabel» per ils iniziants
Malgrà ch'i haja dà in Na a l'urna è la Gruppa per ina Svizra senz'armada (GsoA) cuntenta cun il resultat. Pertge la cumpart da vuschs Gea saja gronda. Ord vista da la GsoA possian ins tuttavia valitar il resultat sco success, ha la secretaria da la GsoA, Nadja Kuhn ditg envers l'agentura da novitads Keystone-SDA.
Era Grischun di Na
Il chantun Grischun na sustegn betg l'iniziativa. 61,3 pertschient da las votantas e dals votants han ditg Na a l'idea da scumandar la finanziaziun da material da guerra.
Questa carta illustrescha ils resultats da mintga vischnanca. Cun in clic sin la vischnanca cumpara il resultat da quella.
Be 6 da 105 vischnancas han ditg Gea
Sulet en sis vischnancas ha la maioritad da las votantas e dals votants approvà l'iniziativa: Lon (60,1 pertschient), Scharans (54,7 pertschient), Flerden (53,9 pertschient), Tumleastga (52,2 pertschient), Seewis (50,5 pertschient) e Trin (50,1 pertschient).
Cun passa 80 pertschient ed uschia il pli cler, han las vischnancas Furna (81 pertschient) e Buseno (83,9 pertschient) refusà l'iniziativa.
Per tge vai?
Daners svizzers na duain betg vegnir investids per finanziar material da guerra. Inizià l'idea han represchentants da la Gruppa per ina Svizra senz'armada (GsoA) ed ils Giuvens Verds.