Nagin duai vegnir discriminà perquai ch’el è omosexual u bisexual. Perquai duai il criteri da l’orientaziun sexuala vegnir agiuntà a la lescha d’antirassissem. Quai ha ditg la cussegliera federala Karin Keller-Sutter avant las medias a Berna. Ils 9 da favrer decida il suveran a l'urna davart questa adattaziun.
Che la midada mettia en privel la libertad d’opiniun, sco quai ch’ils adversaris da gruppaziuns e partidas religiusas e la giuvna PPS pretendan cun lur referendum, na constettia betg. I saja era vinavant pussaivel da far spruhs e sgnoccas. Quai ch’ins na dastgia dentant betg pli far è disfamar e far appel ad odi cunter carstgauns omosexuals e bisexuals. Quai duai vegnir chastià en l'avegnir. «Ins na po perquai betg dir che la libra opiniun n’è uschia betg pli garantida. Odi n’è nagina opiniun.»
I vegnia era vinavant ad esser lubi d'exprimer persvasiuns religiusas e l'atgna opiniun, era a moda critica, ha Keller-Sutter agiuntà. Scumandà vegnia mo quai che violeschia cleramain il nuschegl da la dignitad dad in uman.
RTR novitads 17:00