Siglir tar il cuntegn

Header

Navigaziun

Oz decida il suveran Grischun davart duas iniziativas federalas ed ina iniziativa Grischuna sco era davart in conclus federal.
Legenda: Dumengia da votaziuns. Oz decida il suveran Grischun davart duas iniziativas federalas ed ina iniziativa Grischuna sco era davart in conclus federal. Alice Bertogg, RTR
cuntegn

Votaziuns Oz è dumengia da votaziuns!

Oz decida il suveran svizzer sur da las iniziativas agraras da fair-food e per la suveranitad alimentara. Plinavant han svizras e svizzers era da votar davart il conclus federal davart las vias da velo. En il Grischun stat l'iniziativa per mo ina lingua estra en scola primara en votaziun.

Grischun: Iniziativa per mo ina lingua estra en scola primara

Igl è stà in lung viadi tochen che l'iniziativa per mo ina lingua estra en scola primara è vegnida avant il pievel.
Vegnida inoltrada è ella avant bunamain 5 onns, ils 23 da november 2013. En la sessiun d'avrigl dal 2015 ha il Cussegl Grond - sin proposta da la regenza - declarà l'iniziativa sco nunvalaivla. La dretgira administrativa dil Grischun ed il Tribunal Federal han dentant curregì il parlament e la regenza.
Ils iniziants pretendan che la lescha davart las scola primaras dil Grischun vegnia midada uschia, che tut tenor regiun vegni instruì u tudestg ni englais sco suletta lingua estra ils emprims 6 onns da scola.
Danor la partida populara dal Grischun refusan tut las partidas grischunas l'iniziativa. La Partida Populara ha dentant decidì nagina parola, ella ha laschà liber a ses commembers co votar en chaussa, il medem vala per l'uniun grischuna d'artasinadi e mastergn dal Grischun.