Quai che vegnia pretendì cun l'iniziativa per concerns responsabels, duessi sa chapir gia ozendi. Concerns cun sedia en Svizra duain vegnir fatgs responsabels qua, sch'els violeschan en auters pajais tar lur fatschentas en l'exteriur ils dretgs umans sco er ils dretgs minimals d'ambient. lls blers concerns sa tegnian gia oz vi da quellas reglas. I dettia dentant er intginas excepziuns. Cun in Gea a l'iniziativa stoppian en futur er quels concerns surpigliar responsabladad, argumentescha la PS Grischun. L'iniziativa saja in pass impurtant per proteger ils dretgs umans ed ils standards d'ambient.
Il Gea a l'iniziativa cunter affars cun material da guerra argumentescha la PS Grischun cun las bleras unfrendas da guerra ch'i dat mintga onn. Il medem mument profiteschian concerns dad armaziun cun vender armas a las partidas da conflict. Cun l'iniziativa vegnia franà che producents da material da guerra vegnian finanziads cun daners svizzers, scriva la PS Grischun. L'iniziativa saja pia in pass per in mund pli paschaivel.
