La Partida socialdemocratica dal Grischun ha dà or sias parolas per las votaziuns dals 7 da mars:
- Na a l'iniziativa per scumandar da cuvrir la fatscha
- Na a la lescha davart l'identificaziun electronica
- Gea a la cunvegna economica tranter ils stadis da l'EFTA e l'Indonesia
Scumond da cuvrir la fatscha
Sco la Partida socialdemocratica scriva en sia communicaziun, na vegnia l'iniziativa betg da cuntanscher sias finamiras da proteger da l'islamissem u encunter caots sco hooligans suenter gieus da ballape. L'iniziativa rinforzia anc ils resentiments encunter l'islam e questa ostilitad vegnia projectada sin il corp feminin.
Empè da proteger las dunnas che portan ina burca fetschia quai dapli donn ad ellas. Dunnas che vegnian sfurzadas da purtar la burca fissan en privel da vegnir isoladas anc pli ferm. Ch'il corp da la dunna stoppia star nà per debattas politicas saja per se fauss e na portia betg vinavant l'egualitad.
Lescha davart l'e-ID
Da principi sustegna la PS l'idea per ina e-ID en la rait. Lur resistenza fundeschia sin la dumonda: Tgi duai porscher in tal servetsch. En la varianta actuala fiss la regenza sulet responsabla da metter a disposiziun las datas. Las e-IDs duain vegnir messas a disposiziun da privats, scriva la PS en sia communicaziun. Tenor la PS na saja quai betg en urden che quests privats èn lura responsabels per arcunar las datas. Qua dettia in potenzial per far maldiever.
Cunvegna cun l'Indonesia
Cun regular l'import d'ieli da palmas saja la Svizra sin la dretga via. Da colliar la duana sin ils products cun cundiziuns da persistenza procuria persuenter che tals products persistents vegnan avantagiads. Ina tala cunvegna è nova e portia bler potenzial.
