Delegads e delegadas han ditg Gea a la lescha da CO2, a la lescha da Covid-19 ed a la lescha per cumbatter il terrorissem. In Na datti per l'iniziativa d'aua da baiver netta e l'iniziativa per ina Svizra senza pesticids sintetics.
Trais giadas Gea
La gronda part dals delegads e da las delegadas èn s'exprimids per la lescha da CO2. Quella lescha saja in bun cumpromiss e cuntegnia mesiras equilibradas, e quai socialmain ed economicamain. Cun la lescha da CO2 possian ins far in pass en direcziun d'in provediment d'energia schuber, segir ed anc adina pajabel, ha ditg cusseglier naziunal Stefan Müller-Altermatt. Uschia recumonda l'Allianza dal Center a votantas e votants da refusar il referendum cunter la lescha.
Il medem valia per il referendum cunter la lescha anti-terror. Quella lescha cumpletteschia l'instrumentari che la Svizra haja gia per cumbatter il terrorissem cun mesiras preventivas.
Il terz Gea pertutga la lescha da Covid-19. Quella saja necessaria, ha cussegliera naziunala Ruth Humbel ditg. Senza sustegn finanzial fissi quai fatal per interpresas pitschnas u mesaunas.
Duas giadas Na
Dapli da discutar han las duas iniziativas agraras dà. Tenor ina maioritad da las delegadas e dals delegads èn quellas memia extremas. Tar in Gea vegnian mangiativas pli charas ed entras ina diminuziun dal retgav fissi la basa da viver en Svizra en privel.
Igl è l'emprima giada che l'Allianza dal Center è s'inscuntrada ad ina radunanza da delegadas e delegads, dapi la fusiun da la Partida cristiandemocratica e la Partida burgais-democratica il november passà. L'inscunter ha gì lieu a moda digitala.
