Suenter ils attentats da Paris e Brüssel ha l'Uniun Europeica adattà l'onn 2017 sias leschas d'armas. Perquai vul er la Svizra – sco commembra da la cunvegna da Schengen e Dublin – surpigliar tschertas midadas.
Per tge vai?
La revisiun da la lescha d'armas prevesa pliras mesiras cunter il maldiever cun armas. Uschia duain las armas vegnir marcadas per pudair eruir lur derivanza e per cumbatter la fiera naira. Tgi che venda armas duai vegnir obligà d'annunziar venditas e cumpras al biro chantunal d'armas.
Pertutgadas èn era las buis mez-automaticas cun in magazin da passa 10 patronas: Questas duain en l'avegnir valair sco armas scumandadas. Tuttina duai esser pussaivel da cumprar e duvrar talas buis – era per il sport da tir. Da nov dovra la cumpra dentant ina lubientscha speziala.
Tiraduras e tiradurs ston plinavant cumprovar suenter 5 e 10 onns ch'els sajan commembers d'ina societad da tir ubain ch'els sajettan regularmain cun quest'arma. Tgi che posseda gia ina tala buis mez-automatica cun magazin grond po salvar ella, sto dentant annunziar ella aifer trais onns al biro chantunal d’armas.
Arguments PRO
Cun las midadas en la lescha d'armas veglian ins proteger la populaziun, argumentescha il Cussegl federal. Ed insumma
- tgi che vul dastga vinavant prender a chasa l'arma militara suenter la fin dal servetsch militar
- la tradiziun da tir po viver vinavant en Svizra
- per chatschadras e chatschaders na sa mida medemamain nagut
Regenza e parlament averteschan dentant da las consequenzas d'in NA ils 19 da matg: La Svizra na fiss betg pli commembra da l'allianza da Schengen/Dublin.
Quai vul dir per exempel: La polizia n'avess betg pli access sin sistems d'investigaziuns, la Svizra stuess puspè examinar dumondas d'asil da persunas ch'èn gia vegnidas refusadas en in auter pajais europeic ed i dess puspè controllas da persunas sin plazzas aviaticas.
Arguments CONTRA
La cuminanza d'interess «Schiessen Schweiz» ha fatg il referendum cunter la revisiun da la lescha d'armas e cunquai cuntanschì ina votaziun a l'urna. Ils adversaris fan valair che
- il Cussegl federal haja capitulà sin squitsch da l'UE
- las mesiras sajan totalmain invanas cunter il terror
- la lescha haja consequenzas negativas per il sport da tir
Insumma saja questa revisiun be l'emprim pass vers in scumond da posseder armas, avertescha il comité naziunal che sa cumpona da represchentants da la PPS, da differentas organisaziuns militaras e dad uniuns da tir.
Easyvote declera il midament da la lescha d'armas
RTR votaziuns