Suenter ch'igl è vegnì giu crappa sonda passada resta il pass dal Susten serrà. Naiv e nivels impedeschian las lavurs da rumida.
Tenor las autoritads uranaisas vegnian quellas a cumenzar uschè prest sco l'aura lubeschia. Ins na stoppia betg segirar il grip, mabain sulettamain allontanar crappa ch'è vegnida lucca.
La sonda èn radund 6 fin 8 meters cubics grip vegnids giu sin il territori dal Sustenbrüggli, radund 2 kilometers sut il pass da la vart uranaisa. Quai ha la polizia chantunala inditgà sin dumonda da l'agentura da novitads Keystone-SDA.
Damai ch'ins quintava ch’in ulteriur crappun pudess crudar giu, e perquai che la prognosa preveseva plievgia han ins gì serrà la via. L'access da mintga vart dal pass è vinavant pussaivel. Da la vart uranaisa dal pass è la via averta fin al Sustenbrüggli, da la vart bernaisa fin l'autezza dal pass.