cuntegn
WEF 2022
-
Ha Tavau pers il spirit?
Tavau u betg Tavau – nua ha lieu il WEF 2022? Decleraziuns dal fundatur dal WEF Klaus Schwab procuran per malsegirezzas, schebain Tavau duai esser vinavant l'ospitant per il pli grond inscunter tranter economia e politica.
En in'intervista lascha il fundatur dal WEF Klaus Schwab dubitar, che Tavau vegn ad esser era il 2022 ospitant dal Forum mundial d’economia. Singapur saja in’alternativa. A questa conclusiun èn ins vegnì, perquai ch'igl avess gì da dar pervi da la pandemia in WEF en furma pli pitschna a Singapur. Dentant er quel è vegnì annullà pervi da la pandemia.
Dad ir vers Asia saja er ina ponderaziun, perquai ch'il center economic sa spostia en quella direcziun, di Schwab en l'intervista. Entant che Singapur vegn ludà sco bun'alternativa, crititgescha el dentant l'excess da pretschs a Tavau e la dimensiun dad eveniments enturn il WEF. In punct da critica ch'il landamma da Tavau, Philipp Wilhelm, po chapir. Gia dapi onns sa fatschenta Tavau cun quella problematica. Ins emprovia anc ina giada da schliar quella, di Wilhelm.
Tuttina è el pulit segir ch'il WEF 2022 ha lieu a Tavau. Ins saja gia vid organisar quel e quai ensemen cun il WEF. L'unic che pudess far in stritg tras il quint fiss il coronavirus, è Wilhelm persvadì. Da las decleraziuns da Klaus Schwab na sa lascha el betg far vegnir malsegir. Philipp Wilhelm descriva perfin la relaziun tranter Tavau ed il WEF sco fitg buna e fitg averta.
Sch'il WEF ha definitivamain lieu a Tavau, vegn decidì l'avust.
Tavau u betg – analisa da Fabia Caduff
Avrir la box
Serrar la box
«Tenor mai è quai tactica da crear malsegirezza – e sche insatgi sa, co che tactica funcziuna è quai Klaus Schwab. El crititgescha dapi onns che l’excess da pretschs a Tavau n’è betg acceptabel e che tut quai enturn il WEF stoppia vegnir redimensiunà. Ed ussa cun avair Singapur sco alternativa ha el in instrument per far squitsch ch'i funcziunass era senza Tavau, sche la situaziun na sa mida betg.
La probabilitad è e resta dentant gronda, ch'il WEF resta almain per il 2022 anc a Tavau. D’ina vart ha Klaus Schwab empermess quai a las persunas da Tavau en ina charta da lecturas e lecturs. Be uschia n'ha el segir betg fatg quell‘empermischun. Ed in auter punct è, ch'i vegn gia lavurà vi da l’organisaziun per il WEF 2022. Contracts sco quels tranter l’hotellaria ed il WEF èn gia curt avant la suttascripziun. Ed il landamma da Tavau, Philipp Wilhelm, ch'è era regularmain en contact cun il WEF, ha mussà grond optimissem. Perquai dubit jau, che Singapur daventia il nov Tavau.
Era perquai ch’ins na po betg sutvalitar il «Davos Spirit» – ins pudess dir che quai è era in dals trumfs da Tavau. Da dar si quel spiert che fa ora il WEF n’è segir betg en l'interess dal Forum mundial d’economia.
Fabia Caduff
Correspundenta Chasa federala
Avrir la boxa da profil
Serrar la boxa da profil
Fabia Caduff rapporta per RTR da Berna. Sco correspundenta persequitescha ella la politica naziunala, quai vul dir decisiuns dal Cussegl federal e debattas dal Parlament federal. Ella rapporta dentant era en general da temas svizzers ed en spezial dals Rumantschs en la Bassa.
