Per ils onns 2025 fin 2027 vul il Cussegl federal vinavant trametter maximalmain 5'000 schuldatas e schuldads per segirar il Forum mundial d'economia. Ultra da quai vul il Cussegl federal che la Svizra sa participescha era en l'avegnir als custs per las mesiras da segirezza, quai cun maximalmain 2,55 milliuns francs per onn. Il Cussegl federal respunda uschia ad ina dumonda dal chantun Grischun. Decider sto dentant anc il parlament federal.
Ils 2,55 milliuns francs per sustegnair las mesiras da segirezza restassan en il rom dal sustegn finanzial dals trais onns passads e correspundian a 25% dals custs totals, ha communitgà il Cussegl federal. La fundaziun WEF vul percunter auzar ses sustegn per las mesiras da segirezza per 12,5% . Uschia duai la cumpart dal chantun Grischun e da la vischnanca da Tavau sa reducir da 37,5% sin 25%, cumpareglià cun ils trais onns passads.
Il parlament duai decider en las sessiuns da stad ed atun davart l'engaschi da l'armada ed il sustegn finanzial. Il credit d'obligaziun per trais onns munta a 7,65 milliuns francs. Ils custs per l'engaschi militar fissan cuverts sur il preventiv da l'armada.
Pretensiuns da segirezza pli autas
La polizia na possia betg garantir suletta la segirezza a l'inscunter da persunalitads or da l'economia, la politica e la societad, argumentescha il Cussegl federal. Ultra da quai accentuescha la regenza svizra ch'il WEF saja in inscunter nua che fin 300 politichers e represchentantas d'organisaziuns internaziunalas, pia persunas protegidas dal dretg internaziunal public vegnian ensemen. Da sustegnair il chantun Grischun saja perquai necessari, ils proxims onns tant pli perquai che la situaziun da segirezza saja vegnida mendra.
