Siglir tar il cuntegn
cuntegn

Svizra WEKO prenda en mira instituts da finanzas

Las bancas vegnan suspectadas da preferir il sistem da pajar mobil svizzer Twint e da boicottar ulteriurs sistems sco Apple Pay u Samsung Pay.

Telefonin pront per pajar en in maun.
Legenda: Instituts finanzials èn suspectads da preferir Twint ad ulteriurs sistems da pajar mobils. Keystone

La Cumissiun da concurrenza WEKO pren en mira divers instituts da finanzas svizzers pervi dal suspect da boicottar schliaziuns da pajaments mobilas internaziunalas sco Apple Pay u Samsung Pay. Sco quai che la cumissiun da concurrenza scriva haja perquai dà razzias tar las bancas Credit Suisse, UBS, la Postfinance sco er tar las firmas da cartas da credit Swisscard ed Aduno.

L'inquisiziun duai sclerir sch'ils instituts sajan sa cunvegnids da betg sustegnair las schliaziuns dad Apple Pay u Samsung Pay per uschia privilegiar la schliaziun svizra Twint.

Renfatschas na sajan betg giustifitgadas

La filiala da La Posta, la Postfinance, ha declerà da vulair cooperar cun la WEKO per sclerir ils fatgs. L'interpresa saja persvasa da betg avair cuntrafatg al dretg da cartels svizzer.

Er la Credit Suisse è persvasa che las renfatschas na sajan betg giustifitgadas. La banca porschia gia sur la societad affiliada Swisscard la pussaivladad da duvrar Apple Pay e Samsung Pay.

Avant dus onns han las bancas fusiunà Twint cun il concurrent Paymit. Dapi lura tutga Twint a las sis pli grondas bancas svizras ed al purschider d'infrastructura da finanzas Six.

RR novitads 08:00