Il reschissur svizzer Werner Düggelin è mort en la vegliadetgna da 90 onns. Sco illuminader al teater da Turitg ha el en la vegliadetgna da 19 onns chattà sia amur per il teater. Da là è el ì ils onns 1950 a Paris, nua ch'el ha fundà sia atgna cumpagnia da teater. Suenter avair vivì e lavurà a Darmstadt e Minca ha el il 1968 surpiglià l'intendanza dal teater da la citad da Basilea. Durant quel temp ha el fatg enconuschent il teater da Basilea sur ils cunfins svizzers ora ed igl è gartegià ad el da mobilisar glieud giuvna da visitar il teater.
Dapi il 1975 è el lura stà engaschà sco reschissur liber sin differentas tribunas en l'Europa. Anc cun 89 onns ha Düggelin inscenà ses ultim teater a Turitg.
Werner Düggelin è stà in dals impurtants reschissurs da teater da la Svizra. Senza el na fiss il teater svizzer betg quai ch'el è uss, scriva SRF. El ha inspirà reschissurs, acturs ed auturs sco nagin auter reschissur svizzer. Düggelin è stà in dals emprims reschissurs tudestgs che han inscenà ovras da Samuel Beckett u Albert Camus.
Per sias ovras è el vegnì onurà cun differents premis, tranter auter cun ils Hans-Reinhard-Ring (1987), il premi da cultura da Basilea (1995), il premi da teater Nestroy (2010) ed il premi da cultura da la citad da Turitg (2014).