Whistleblowers - Parlament lascha ils reveladers en intschertezza - Novitads

Whistleblowers Parlament lascha ils reveladers en intschertezza

Ina nova lescha ch'avess pudì proteger ils reveladers ha fatg naufragi en il parlament. La proposta saja memia cumplitgada e mal chapibla.

Autur: SDA / Corina Luck

Il Cussegl naziunal ha refusà per la segunda giada la proposta per proteger revelades.
La maioritad era da l'avis che la proposta portia nagina clerezza ma chaschunia intschertezza giuridica.

Il Cussegl naziunal ha refusà la proposta cun 147 cunter 42 vuschs la fin finala cleramain. Uschia resta il dilemma dals whistleblowers. Els vulan annunziar irregularitads al plaz da lavur ord motivs da conscienzia. Els ston dentant savens pajar lur engaschament cun relaschada ed ina persecuziun penala.

Lescha memia cumplitgada

Pledadras da la PLD, PS e dals Verds han argumentà che questa lescha saja memia cumplitgada, pauc effizienta e na portia nagina clerezza mabain malsegirtad legala. Il Cussegl dals chantuns era entrà d'atun en debatta. Per tgi che va en l'avegnir a la publicitad cun irregularitads a la plazza da lavur porta uschia er vinavant il ristg da perder sia plazza.