L'Organisaziun mundiala da la sanadad WHO cusseglia in medicament dal concern svizzer Roche per grevs cas da corona. Dal medicament, ch'ha num Tocilizumab, pudessan pazientas e pazients che pateschan fitg da Covid-19 profitar, scriva la WHO. En cumbinaziun cun in segund medicament sa reduceschia la mortalitad e la necessitad da respiraziun artifiziala per mintgamai radund 20%, sco datas da 11'000 cas mussan.
Appel a Roche
L'organisaziun Medis senza cunfins appellescha il concern svizzer da dar a pajais povers la savida per producir il medicament u da surdar a quels licenzas pli bunmartgadas. Tocilizumab datti dapi il 2009 e vegn duvrà cunter pliras malsognas. Da producir 400 milligrams custa quai 37 francs. Sin il martgà è il medicament però fitg char, scriva la SDA. En ils Stadis Unids custa ina dosa da 600 milligrams passa 3'300 francs. Dapi il 2017 è la protecziun da patenta scrudada. Però impedeschian ordinaziuns da protecziun ad auters pajais da producir copias dal medicament, scriva l'organisaziun Medis senza cunfins.
