Avant 50 onns è la zecca da la sort hyalomma vegnida chattada per l'emprima giada en Svizra. Ditg èsi stà ruassaivel enturn ella. Ussa survegn ella tscherta attenziun, en las medias, ma era tar scienziads. La raschun è ch'in um è mort en Spagna, perquei ch'ina tala zecca tropica ha mors el. La zecca ha chaschunà ina malsogna, l'uschènumnada fevra da Crim-Congo. L'expert da zeccas Werner Tischhauser enconuscha las zeccas tropicas e sa tge ch'è auter cumpareglià cun zeccas indigenas.
Sco quai che Tischhauser ha ditg sin dumonda da RTR, po questa zecca daventar fin tschintg giadas pli gronda che las indigenas ed ha chommas strivladas. Ultra da quai sajan ellas chatschadras activas cun megliers egls che nossas zeccas indigenas. Ma tema na stoppian ins betg avair, gi Werner Tischhauser plinavant. La schanza da vesair ina zecca hyalomma saja fitg, fitg pitschna.
Il mument èsi anc uschia, ch'ils animals vegnan en Svizra cun ils utschels migrants che vegnan si da l'Africa. Els na pon actualmain anc betg surviver l'enviern fraid tar nus. Quai possia però sa midar en il futur, di l'expert.
Il chavazzin è la «midada dal clima». Sche l'enviern daventa pli e pli chaud, po quai esser, che questas zeccas vegnan a surviver tar nus.
Werner Tischhauser è persvas, ch'ins sto uss agir e perscrutar questas zeccas, ubain ch'i dat consequenzas. El sa fa quitads pervia da la malsogna, che questas zeccas portan. Sco quai ch'ins ha vesì vi da l'exempel da l'um en Spagna, po la malsogna esser mortala.
El recloma che nagin perscruteschia pli da rudien en chaussa. El di che quai saja sco en l'economia, sch'i na dettia betg daners na saja betg interessant.
Nus avessan uss da perscrutar las zeccas – betg pir cura ch'ils emprims èn en l'ospital.
Tge ch'il futur porta e sche questas zeccas pon surviver l'enviern en il futur, n'è anc betg cler. Werner Tischhauser spera simplamain, che la Svizra saja pronta per quest mument.