Siglir tar il cuntegn

Header

cuntegn

Svizra Zermatt è danovamain isolà

Pervia dal privel da lavinas è Zermatt danovamain isolà. Tenor las indicaziuns da la Viafier Matterhorn Gotthard datti dapi dumengia suentermezdi ina punt d'aria cun helicopters che sgolan da Täsch a Zermatt.

Tenor las indicaziuns da Zermatt Turissem è il vitg turistic betg pli cuntanschibel sin via u binaris dapi sonda saira. Radund 9'000 giasts da vacanzas sajan en il vitg. Dapi la dumengia suentermezdi sgolan dentant helicopters da Täsch a Zermatt. Quella vegn utilisada intensivamain: ina fotografia da la gasetta «Le Matin» mussa lungas colonnas davant ils helicopters.

Anc almain fin il glindesdi da mezdi na curseschan nagins trens tranter Täsch e Zermatt, uschia la Viafier Matterhorn Gotthard.

Avant curt era Zermatt er gia isolà

Zermatt era gia avant bunamain 10 dis isolà pervia dal privel da lavinas. 13'000 turists han curt suenter la midada da l'onn stuì spetgar dus dis u pigliar in helicopter per bandunar la destinaziun da vacanzas.

Evacuaziuns en il Vallais / mesiras da segirtad a Tavau

En il Vallais è il privel da lavinas grond – quai è il segund aut stgalim. SRF Meteo scriva ch'il privel da lavinas pudess enfin il glindesdi s'augmentar al pli aut stgalim. En parts cunzunt privlusas han ils abitants perquai stuì bandunar lur chasas. Pertutgads èn stads ils abitants da parts da La Fouly, Zinal en la Val d'Anniviers ed a St.Niklaus.

Era en autras parts da la Svizra è il privel da lavinas grond.

RR novitads 15:00

Artitgels legids il pli savens